Mugikortasun Iraunkorraren Europar Astea dela eta, irailaren 22ra bitartean hainbat jarduera izango dira Leioan: patinak, cart-ak, kamisetak "tuneatzeko" tailerra, belaunaldien arteko soinketa...
Hilaren 17, 18 eta 19an, 10:00etatik 12:00etara, Bulebarreko Stoan antolatutako jarduerak udalerriko ikastetxeentzako izango dira bereziki. Bestalde, irailaren 22an, “Nire autorik gabeko eguna” izango da, horretarako Aldapa kalea moztuko dute goizeko 9etatik arratsaldeko 20:00etara, eta errepidea eta aldameneko parkea erabiliko dira patinatu, bizikletan ibili eta jolasteko. Goizez ikastetxeentzat izango da eta 17:00etatik 19:00etara hurbildu nahi duen edozein herritarrentzat.
Larunbat honetan, irailak 20, “Oinezkoen pausora” izeneko hamargarren ibilaldia egingo da Leioan, Mugikortasunaren Europako Astearen baitan. "Ibilaldia partaidetzarako eta topaketarako lekua da. Bertan, elkarri kontatu ahal izango diogu udalerriko kaleak nola ikusten ditugun, mugikortasun urbanoko akatsak partekatu eta konpontzen saiatu, txoko ederrez eta leku atseginez gozatu, eta harro begiratu ondo egindako lanari", adierazi dute udal iturriek. Irteera 11:00etan izango da Sakoneta kiroldegitik, eta hortik udalerriko hainbat txokotik pasatuko dira parte hartzaileek: Pinosolo parkea, Txistulariaren eskultura, Gaztelubideko jagolearen etxea, Artatza-Pinueta ikastetxea, Ondiztorrea, Aldapa parkea eta Txomin Aresti ikastetxean amaituko da. Bidean dabiltzala, berde koloreko zebra batzuk ikusiko dituzte ibiltariek lurrean margotuta. Horien buruak markatzen du martxaren norabidea. Bidean aurkituko dituzten gazte eta hezitzaileei galdetzeko aukera ere izango dute. Argazkia: cc-by-nc-sa Herrigune.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun