PPren planteamendua
Proposamen popularrak gogoratzen zuen Artatzaren proiektua 1914koa dela eta Manuel Smith Ibarra arkitektoak egin zuela Trianoko markes Victor Txabarri enpresariarentzat. "Joan den mendeko 10eko hamarkadaren erdialdeko hazkunde ekonomikoaren eta horren ondoriozko arte-berpizkundearen fruitu da jauregia, Smith arkitektoaren lanik esanguratsu eta onena, eta Ingalaterrako Ana Erreginaren estiloaren interpretazio lokal garbia". Gerra Zibilean gudarien kaserna ere izanda, Eusko jaurlaritzak 1989an eskuratu zuen eta zati bat zaharberritu egin zuen. Bitartean, Bizkaiko Foru Aldundiak lorategien ardura bere gain hartu zuen, parke publiko bihurtuz. Eusko Jaurlaritzaren Kontseiluak 1997an Artatza jauregia ustiatzeko oinarriak onartu zituen, eta Lehendakaritzak kudeatu zituen geroztik eraikinaren administrazioa eta mantentze-lanak. Bertan, lehendakariek ministroak eta enbaxadoreak hartu zein gobernu batzarrak antolatu ditu, besteak beste. Horretaz gain, erakunde publiko eta pribatuek bilerak, afariak, ekitaldiak, kongresuak eta mintegiak egiteko noiz edo noiz alokatu dutela gogoratzen zuten popularrek.
"Hala ere, instalazioak, eraikinak eta lorategiak mantentzearen kostua kontuan izanda, ez da lortzen lursaila errentagarri egiterik, haren aukerak ikusita" nabarmentzen zuten. Egoera horri buelta emateko eta "ideia berriak" planteatzeko ideia lehiaketa iradoki zuten. PSE-EEk gehitzeko zuzenketa egin zien, auzokideek eraikina gehiago erabil zezaten erraztasunak emate aldera. Testua txertatzeko prest agertu zen Carmelo Barrio herenegun eta baita, nahi izanez gero, Getxoko Udalak eta Bizkaiko beste edozein udalak eraikina erabiltzeko ere. Vicente Reyes sozialistak aitortu zuenez, aurreko Jaurlaritza saiatu zen Artatzaren erabilpena sustatzen, baina ez zuen lortu. Ahalegina jarraitzeko eskatu zion EAJren exekutibo berriari.
Artatza saltzeko eskatu du Maneirok
UPDk ideia lehiaketaz haratago joan zen, Artatza jauregia saltzeko eskatuz. Bere ustez PPk asmo ona dauka, baina aurkeztutako lehiaketa ez da konponbidea, eraikina "alferrik delako". Bere ustez, Lehendakaritza egoitzak eta Ajuria Eneak jada betetzen dituzte lehendakariak protokolo aldetik dituen beharrak eta Artatza erabilpenik gabe gelditu da, "gero eta gutxiago". Bere ustez, salmenta ez litzateke "bihar edo etzi" izango, higiezinen merkatuaren egoera dela eta, baina aztertu beharreko aukera da.
Abertzaleak lehiaketaren aurka
Juan Antonio Arieta-Araunabeña legebiltzarkide jeltzaleak gogor kritikatu zuen Maneiroren jarrera eta gezurti eta koldarra izatea egotzi zion, oihartzun mediatikoaren babespean direnak eta ez direnak esateagatik. PPri zuzenduta, negozio helburua besterik ez izatea leporatu zion eta ondare publikoa defendatzea lehenetsi zuen. Era berean, galdetu zion zergatik PPk Araban dituen hainbeste eraikin publiko erabilpen mugatuaz edo erortzeko zorian bere erakundeek utziak. PSE-EEri Artatzan "erabaki txarrak" hartu izana aurpegiratu zion.
EH Bildu koalizioari dagokionez, hiru argudio erabili zituen PP, PSE-EE eta UPDren proposamenen aurka egiteko: ondare publikoen pribatizazioa ekiditea; Leioa eta Itzubaltzeta / Romoko auzokideek prozesu parte-hartzaile baten bidez Artatza jauregiaren gaineko erabakiak har ditzaten; eta enpresa pribatuen inplikazioa puntuala izatea, kudeaketa publiko baten pean.
Gauzak horrela, PSE-EEren gehitzeko zuzenketa atzera bota zuten, 9 ezezko boto, 5 baiezko eta UPDren abstentzio bakarra jasota. PPren proposamenak ere emaitza bera jaso zuen eta UPDko osoko zuzenketak adostasun gehien lortu zuen. Beste talde guztiek bere aurka egin zuten, 14 ezezko eta baiezko bakarra izan zirela.
Eusko Legebiltzarrak Artatza jauregia gehiago erabili eta autofinantziazio maila handitzeko ideia lehiaketa martxan jartzea baztertu egin du. Herenegun, astelehenean, Kultura, Euskara, Gazteria eta Kirol Batzordeak atzera bota zuen, EAJ eta EH Bilduren botoz, PPk ildo horretan aurkeztutako mozioa eta baita PSE-EEk eta UPDk jarritako zuzenketak. Lehendakaritzaren jabegoa den Artatza jauregiaren etorkizuna Eusko Jaurlaritzak darabilen "Administrazioa arrazionalizatzeko eta neurriz egokitzeko prozesuan" kokatu zuen Juan Antonio Arieta-Araunabeña legebiltzarkide jeltzale areetarrak. Carmelo Barrio popularrak defendatu zuen Bizkaiko Batzar Nagusietan zein Leioako Udalean aurretik aurkeztu eta atzera botatako proposamena, Eusko Jaurlaritzari ideia-lehiaketa bat antola dezan eskatzen ziona, Artatza jauregia "balioetsiko duen estrategia berri bat bilatzeko, haren erabilera areagotzeko eta jauregia zaintzeak eta mantentzeak dakarren diru publikoaren inbertsioa errentagarriago egiteko". Batzordean UPDko Gorka Maneirok erabilitako datuen arabera, 2008tik 2013ko urrira bitartean jauregia 155 egunetan erabili zen, horietatik 63 ezkontzak burutzeko, 52 Bizkaitik Bizkaira bisita programaren barruan eta 40 lehendakariak egindako harrera ekitaldietarako eta bestelako ekimenetarako. Bitartean, politikari arabarrak salatu zuen mantentze lanek 700.000 euro kostatu zituztela eta diru sarrerak "100.000 baino gutxiago" izan zirela, diru galerak sortuz. Argazkian, Patxi Lopezek gidatutako Eusko Jaurlaritzak Gobernu Batzarra burutu zuen Artatza jauregian 2010eko maiatzaren 4an / cc-by Irekia.net - Eusko Jaurlaritza.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun