Praktika artistiko heterogeneotatik abiatuta –Oñate Pintura masterrean dago eta Ruiz Ikerketa eta Sormenekoan– 25 lanez osatutako proiektua prestatu dute, bakoitzaren tankera azaltzen duten banakako artelanetan eta elkarrekin egindako beste batzuetan.
Matxalen Oñaten aburuz, “Costa Calma espazio aldagarria da, non, piezak kokatu, bildu eta erlazionatzen diren. Piezak tartekatzea eta topaketa berriak suertatzea xede nagusia duen prozesu ludikoa” da. Jira-birak bilatzen ditu, gai berari buruzko ikuspuntu zabalagoa aurkitzeko, eta ikuslea piezak ukitzera gonbidatzen du.
“Banderak, estandarteak, paretan zintzilikatutako oihalak, Pop Up hedatuak, paperezko pieza txikiak, mosaikoak eta bideoak. Bidaia baten oroitzapenak, merkatu bat, kanpin-denda arrosa eta berdea” dio berak. “Costa Calma” izena jarri dio.
Mikel Ruizek, bestalde, haurtzarorik urrunenera jo du familiaren argazki bildumaren bitartez, piktorikoki eraldaturik “desagertutako hainbat oroitzapen berreskuratu nahian”. “Inkontzienteki ahaztutako bizipenen birplanteaketa” erakusten du lanotan.
“El Festin” izeneko horren bitartez, azken urtean zehar burututako ikerketa eta sormen lana biltzen du Mikel Ruizek, eta bertan festaren kontzeptuaren eta bere prozesu artistikoaren artean egon litezkeen parekotasunak planteatzen ditu. Bere ikuspegitik, “festa eta prozesu artistikoa intentzionalak diren bi ekintza izateaz gain, ospatze edo burutze konpromiso zehatz batzuk eskatzen duten bi jarduera dira”. Eta esan du be “nolabaiteko elkartopaketa bultzatzen duten bi mundu hauek, eskaintzen duten askatasunaren bidez egunerokotasuneko mugak apurtzeko edo hauetatik urruntzeko aukera opa zaigu”.
Jesus Melendez irakaslearen eta erakusketaren komisariaren koordinazinopean, artista biek hiru zatitan banatu dute erakusketa-aretoa. Espazio bi berdinak, bat bakoitzarentzat, eta aretoaren beste zati baten elkarpuntu txiki bat, batera egindako lanak erakusteko, “lan bateratua, uniformea eta egituratua”, Louis Bougeois eta Tracey Emin artisten “Do not abandon me” proiektuaren moduan, baina euren lenguaiarekin.
EHUko Arte Ederretako Fakultateko ikasleak diren Matxalen Oñate Esparza eta Mikel Ruiz Pejenauteren “Costa Calma" eta “El Festin” erakusketak irailaren 30era arte bisitatu daitezke Bizkaiko Batzar Nagusiek Bilboko Hurtado Amezaga kalean duten erakusketa aretoan. Pintura eta Ikerketa eta sormena artean masterretako ikasle horien lanek jarraitzen dute fakultateak eta Bizkaiko erakundeak artista gazteen sorkuntzak plazaratzeko orain arteko lankidetza. Oñate eta Ruizek euren ibilbidean bat egin dute elkarrekin batera atondutako erakusketa-proiektu honetan, unibertsitatean egiten ari diren doktoradutza ikasketen osagarri. Estilo oso ezberdinak dituzten artista biren elkarrizketatzat har daiteke. Argazkian, erakusketaren egileak / © Bizkaiko Batzar Nagusiak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun