Gainera, Udalak jakinarazi duenez, jai eremuetan saltzaile ibiltariak egotea eragotziko da, "legez kanpoko jarduera (tokiko merkataritzarako eragin negatiboa izan daitekeena) ez izateko".
Tabernen ordutegia
Udalerriko ostalaritzaren alde egiteko eta aldi berean herritarren atsedena bermatzeko, Areetako ostalaritza establezimenduek ordu bat eta erdi beranduago itxi ahal izango dute irailaren 19, 20 eta 21ean. Horrela, ostiralean eta larunbatean, 1. taldeko saltokiek (dastalekuak, izozki-dendak, txurro-dendak....) 02:30ak arte zabaldu ahal izango dute; 2. taldekoek (tabernak...) 04:30ak arte, eta 3. taldekoek (pubak...) 06:00ak arte. Igandean, irailak 21, 1. taldekoek 01:00ak arte zabalduko dute; 2. taldekoek 03:00ak arte eta 3. taldekoek, 04:30ak arte.
Terrazetan ohiko ordutegia izango da, 09:00etatik 23:00ak arte, baina ostiraletan eta jai-bezpera egunetan ordubetez luzatu ahalko dute zarratzeko ordua (00:00etara arte) eta udaldian (irailaren 30era arte) 01:00etara.
Berdintasunezko jaiak
Bestalde, Getxoko Udalak martxan jarritako "Eraso sexistarik gabeko berdintasunezko jaiak" lelopeko kanpaina Mesedetako Amaren jaietan ere izango da asteburu honetan, Areetan. "Herritar guztiei zuzendutako ekimenaren seigarren edizioak berdintasunezko jai eredua defendatzen du, pertsona guztiak gozatzeko elkartzen dituena, jokaera sexistarik gabekoa, eta emakumeak irtetea, paseatzea eta askatasun eta lasaitasun osoz ibiltzea ahalbidetzen duena", adierazi dute tokiko agintariek. Ostiralean, hilak 19, txapak banatuko dira kanpainaren leloarekin.
Getxoko Udaltzaingoak dispositibo berezia jarriko du indarrean Areetako Mesedeetako Amaren jaietan, iazkoaren antzekoa, istilurik gerta ez dadin eta adin gabekoei alkohola saltzea ekiditeko. Udalak zigorrak ipiniko dizkie droga-mendekotasun prebentzio alorreko legea hausten dutenei. Udaltzaingoak abiatuko duen operatiboan herritarren segurtasunaz arduratuko den Ertzaintzak eta Udaleko Babes Zibilak ere parte hartuko dute. Besteak beste, polizia-taldeak jai eremutik eta inguruetatik ibiliko dira, bereziki Areetako hondartza gunean. Ostiral arratsaldetik igandera arte adingabeei alkohola ez saltzeko eta edari alkoholikoak atzemateko kontrolak jarriko dituzte. Kasu horietan, adingabeen gurasoei jakinaraziko diete gertatutakoa. Ez legezko salmenta eta adingabekoen alkoholaren kontsumoa kontrolatzeko gaueko txandak indartuko dituzte nabarmen, baita beste era batzuetako istiluak ekiditeko ere, Herritarren Segurtasunari eta Udal Ordenantzei lotuta. Alkoholemia prebenitzeko kontrolak ere egingo dituzte Bide Segurtasun alorrean. Argazkian, dispositibo berezia "eraginkorra" izan dadila eskatu dute gaur Eduardo Andrade eta Marisa Arrue zinegotzi popularrek / © Getxoko PP.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun