Gaur abiatuko dira Areetako jaiak, Mesedeetako Amaren omenezkoak. Horrenbestez, aitona-amonek emango diete hasiera ekitaldiei 13:00etan, Eskoletako plazan izango duten hamaiketakoa dela medio. Hasiera "ofiziala", berriz, Arenas futbol taldeak emango du toki berean, lehenengo taldeko jokalari eta teknikoek pregoia irakurri eta txupina botako dutela. Oholtzan, baina, ez dira bakarrik egongo, ohi bezala iazko jaietako lehiaketa irabazi zuen koadrila ere izango baita, Sugus taldea, kasu honetan. Ekimen horren bidez, jai batzordeak eta koadrilek klubak azken urteotan egindako ahalegina saritu nahi izan dute. Txupin jaurtiketaren ostean, koadrilak kalejiran emango diote buelta herriari, txistulariek eta buru-handiek lagunduta. Irtengunera bueltatuta, haurren txanda izango da Circotito antzerkia dela medio. Gaua irekitzeko bi kontzertu izango dira. Anaitasuna kalean, Nevada Plays Nirvana´s Live And Loud eta The Associados taldeek joko dute. Eskoletako plazako oholtzan, ordea, Smoke Idols eta Maderacore arituko dira. Argazkian, Arenas taldeak irakurriko du pregoia / © Arenas futbol taldea.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
