Jesus Maria Zaballos de LLanos PSE-EEko legebiltzarkideak pasa den otsaila eta martxoko denboraleek kaltetu zituzten Armintza eta Plentziako portuak lehengoratzeko lanen betetze mailaz eta kosteaz itaundu dio Eusko Jaurlaritzari. Pasa den irailaren 11n, Zaballosek hainbat galdera idatziz erantzun eta argitu zedin eskatu zion Ana Oregi Ingurumena eta Lurralde Politika sailburuari. Plentziari dagokionez, kofradiaren finger eta pantalanak izan zituzten matxurei buruz zein San Balendin dikean izandako balizko kalteez galdetu zuen. Armintzan, ordea, Txorropeko pasealekuko murruaz zein inguruko farolez eta hiri altzariez. Zaballosek lan guzti horiek dagoeneko bukatu diren eta kasu horretan zenbat denboran exekutatu diren ala horrela ez bada noizko amaituko diren galdetu du. Horrekin batera, lanen balioa ezagutzeko informazioa ere eskatu du, hala nola, zenbat kostatu duten edo zenbatetan aurreikusten diren eta zein partida ekonomikotik ordaintzekoak diren. Ana Oregik urriaren 7ra arte dauka erantzuteko epea, Eusko Legebiltzarraren prozeduren arabera. Halere, pasa den apirilaren 22an eta 25ean jada hainbat datu kaleratu zituen Zaballosek berak aurretik egindako beste galdera biri erantzutean. Argazkian, Armintzako portua pasa den apirilean zegoen bezala / cc-by-nc-sa Maite Elorza.
Gauzak horrela, Plentzia zein Armintzako lan guztiak maiatzean egitekoak ziren eta obra txikitzat jo zituen Eusko Jaurlaritzak. Armintzako ipar dikea konpontzeko 45.000 euro aurreikusi zituzten eta beste 42.000 Txorroperako. Plentziako pantalanen aurrekontua ere 45.000 eurokoa izan zen. Kasu guztietan, BEZa gehitu beharra zegoen. Bestalde, txosten teknikoetan oinarrituz, Oregik baztertu zuen Plentzian dikeak kalterik jaso izana.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun