Bihar hasiko da Sopela Kosta Fest jaialdi berria. Bost egunetan zehar, irailaren 24tik 28ra bitartean, hondartza inguruan eta udaletxe plazan hamaika jarduera izango dira: surf txapelketak, izen handiko kontzertuak, naturaren babesarekin lotutako jarduerak, eta abar. Jaialdiari hasiera emateko, bihar, surfarekin lotutako zine-maratoia egongo da udaletxe plazako karpan. 20:30ean hasiko dira lehenengo emanaldiak, eta 23:00etan amaitzea aurreikusten da. Uribe Kostako eta inguruko egileen (Kepa Acero, Natxo Gonzalez, Eneko Moro...) film laburrak ikusteko aukera izango da. Jaialdiaren bigarren egunean, Surf Plaza ekimena ospatuko da, surfaren inguruko mahai-inguruekin: Loiola Canales, Pilar Ezkurra, Bea Lamikiz, Ainhoa Aurrekoetxea, Gonzalo Urien, Natxo Gonzalez eta beste hainbat surflarik parte hartuko dute. Hain zuzen ere, horren barruan eskainiko du jaialdiko lehenengo kontzertua Long Boards rock taldeak. Kontzertuaren ostean hainbat DJ izango dira, surfaren historiarekin harremana duen musika jartzen. Argazkian, Sopelako ikastetxeetako eskola-umeak surf ikastaroan, Peña Txuriren eskutik / © Sopelako Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun