Durangoko Azokako gune bakoitzak ekintza berezitua izango du. Nobedade moduan, Durangoko museoan bi tailer egingo dira Artium eta F-Stop Durango taldearen eskutik.
Ekimen hauetan parte hartzeko izena eman beharko dute aldez aurretik ikastetxeek, norbere intereseko ekimenak aukeratzeko. Azokaren webgunean erregistratuta, urriaren 3ra arte dago epea zabalik eskariak sarean egiteko.
Programazioa
Plateruenan, Kontzertu handien plazan, 300 ikaslerentzat emanaldia eskainiko du Ghetto taldeak. Euskal kantagintzako estilo eta garai ezberdinetako kantuen bertsioak izango dira. Parte hartzea erabakitzen duten ikastetxeek kontzertuko kantuak ikuspegi ezberdinetatik aurrez lantzeko materiala eskuratuko dute.
Saguganbaran, txikien eta handien plazan, Oskar Estanga eta Yolanda Arrieta sortzaileek gidatuko dituzte tailer bana. Oskar Estangarekin kantu baten grabaketa egingo dute eta Yolanda Arrietarekin egun batez idazle bihurtuko dira.
Ahotsenea, sortzaileen plaza, barru-barrutik ezagutzeko aukera izango dute ikasleek, eta bertan parte hartuko duten sortzaile bi elkarrizketatzeko tartea izango dute: Revolta Permanent musika taldea eta John Andueza idazlea.
Irudienean, ikus-entzunezkoen plazan, film baten bikoizketa nola egiten den ezagutu eta praktikan jarriko dute bikoiztaile profesionalen eskutik. Egindakoaren emaitza ere unean ikusi ahal izango dute.
Areto Nagusian, hitzaren plazan, Fernando Morillo idazlearen eskutik editoreek liburu baten argitalpenaren abenturan zer lan egiten duten ezagutuko dute ikasleek.
Kabi@n, digitalaren plazan, batetik mugikorrak segurtasunez erabiltzeko aholkuak jasoko dituzte. Horrez gain, mugikorretararako aplikazio bat sortzeko lehen pausuak ikasiko dituzte, eta bigarren tailer batean scratch eta legorekin programatzen hasteko lehen urratsak emango dituzte.
Szenatokian, arte eszenikoen plazan, Zurrunka antzerki taldearekin itzal-txotxongilo antzezlan baten sekretu eta teknikak ikasiko dituzte.
Azoka TBk zuzenean bideoklipez osotutako musika saioa ekoiztuko du. Ikasleek zuzenean jarraitu ahal izango dute saioa platoan, eta bideoklipetako musikariekin solasaldian ibili teknologia berriek ematen dituzten aukerak baliatuz.
Durangoko museoan, bi tailer egingo dira. Lehenengoa Artiumek eskainiko du eta material sinpleenekin esperimentatuz forma ezberdinetako irudiak sortuko dituzte. F-Stop Durango taldeak, berriz, argazki kameraren oinarriak lantzeko tailerra emango du.
"Kantuka" bideoklip-a, besteak beste Getxon eta Sopelan grabatutakoa (© Iker Aginaga eta Iker Villa- Revolta Permanent)
Uribe Kosta eta Erandioko ikastetxeek Durangoko Azokara hurbiltzeko gonbitea jaso dute, Gerediaga elkarteak bidalita. Izan ere, datorren abenduaren 5ean Ikasle Eguna hartuko du Landakoko guneak, 1.200 gaztek parte hartzea espero dutela. Horretarako, baina, ikastetxeek urriaren 3ra bitartean izango dute izena emateko epea. Gerediaga elkarteak jakinarazi duenez, edizio honetan, Ikasle Egunaren iazko esperientziak ikastetxeengandik izan zuen erantzun ona errepikatzeko asmoarekin egitaraua indartu egin da eta Euskal Kulturaren Plazarik handiena barrutik bizi eta ezagutzeko aukera izango dute ikasleek. Elkarrizketak egin, musika kontzertu batean parte hartu, telefono mugikorretarako aplikazio bat sortu, itzalen antzerkiaren teknikak ezagutu, bikoizketan aritu, Revolta Permanent taldeko kideak ezagutu edota kantu bat sortzeko aukera izango dute besteak beste. Guztira 30 saio baino gehiago. Argazkian, hainbat gazte grabazio estudioan Ikasle Egunaren aurreko edizio batean / © Durangoko Azoka.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun