Hain zuzen ere, aisialdirako gune bat egokitzeko asmoa dago, hiri-altzariekin (paperontziak, bankuak, aulkiak, iturriak, kale-argiak...) eta berdegune eta lorategiak izango dituena. Horrez gainera, eremu berria Urduña kalearekin lotzen duten oinezkoentzako ibilbideak urbanizatzeko lanak egingo dira eta urbanizatuko den zatiaren alde batean oinezkoentzako pasealekua ere izango da. Irisgarritasunari dagokionez, lanak indarrean dagoen araudia betez egingo dira.
Auzotarren parte-hartzea
Udalak herritarren parte-hartzea bermatzeko burututako prozesuaren ostean –zeinetan berrogeita hamar bat iradokizun jaso diren–, hasiera bateko proiektua aldatu egin da; izan ere, auzotarren proposamen ugari sartu baitira bertan, Getxoko Udaletik baieztatu dutenez. Jolasgune, hiri-altzari, lorezaintza, irisgarritasun, argi, aparkaleku eta bidegorriari buruzko iradokizunak aurkeztu dituzte, besteak beste.
“Parte-hartze prozesu horrekin, auzokoek lurperatuta geratu den eremuaren urbanizazio proiektuaren definizioa bideratzen laguntzeko aukera izan dute, hiritarrek erabiltzeko esparru berria irabaziz”, aipatu du Arregik.
Irailean bertan abiatu dituzte Getxoko Maidagan kalean lurperatu duten Metro Bilbaoko trenbidearen azaleko zatia urbanizatzeko proiektuaren barruan jasotako lanak. Obrak esleitzeko aurrekontua 741.503,31eurokoa izan da (BEZ barne) eta horiek amaitzeko epea 16 astekoa da. "Egindako ahalegin handiaren ostean", eta inbertsio garrantzitsua eginda Getxon tenbide pasaguneak eta trazaketak eragiten zuten hesi fisikoa kentzeko, "proiektu berriak auzoko kalitatea hobetuko du", udal arduradunen arabera. “Hiri-eremu berria sortuko da, auzokideak elkartzea gehiago bultzatuko duena eta, horrekin batera, auzoaz gozatzea ere. Bertako bizilagunentzako topalekua izango da, aisialdirako gunea, seguruagoa eta eskurago izango dena, hiritarren parte-hartzetik ere sortua”, aipatu du Joseba Arregi Hirigintza zinegotziak. Esparru horren urbanizazioaren bitartez, metroa eta lehenago trenbidea igarotzen ziren zatiari, Getxoko plaza, parke eta aisialdiko beste gune batzuek dituzten antzeko ezaugarriak jarriko dizkiote. Orotara, 4.008 metro koadroko azalera duen espazio publikoa sortu nahi dute, lurrazalekoa. Horretarako, jolas- guneak eta egoteko aldeak egokituko dira (horietako batzuk estalitakoak) eta berdegunea areagotuko da. Argazkian, proiektua 2012ko azaroan aurkeztu eta Maidaganen informazio gunea jarri zuten, auzokideek iradokizunak aurkez zitzaten / © Imanol Landa.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun