Juana Iturmendi Eusko Legebiltzarreko parlamentari popularrak erretiroa hartzeko dimisioa aurkeztekoa dela baieztatu du egunotan Bizkaiko PPk. Medio batzuen ustez, Getxoko PPko idazkari nagusia izandakoa atzo zen kargu-uztea erregistratzekoa, baina oraingoz ez da datu hori baieztatu. Iturmendiren kargugabetzea gauzatu ondoren, popularrek bere ondorengoa aukeratu beharko dute. 2012an aurkeztutako zerrendaren arabera, Marisa Arrue Getxoko PPko zinegotzi bozeramaileari dagokio Gasteizera joateko ardura. Halere, Bilboko Kale Nagusiko egoitzan badira hori segurutzat ematen ez dutenak. Haien ustez, Javier Ruiz Bizkaiko PPko idazkari nagusia eta udal bereko zinegotziarentzat izango litzateke ohorea. Izan ere, pasa den martxoan Anton Damboreneak Ruiz lehenetsi zuen alderdiko barne antolakuntza gidatzeko eta Eduardo Andrade Arrueren konfiantzako laguntzailea kaltetuta irten zen zuzendaritzako mugimenduetan. Ruiz euskararen normalizazioaren aurka zabaldutako mezuengatik egin da ezagun. Argazkian, Arrue, ezkerrean, eta Ruiz, eskuman / © Getxoko PP.
2012ko urriko hauteskundeetan Bizkaiko PPk 70.749 boto eta hiru legebiltzarkide lortu zituen: Antonio Basagoiti, Anton Damborenea eta Nerea Llanos. Basagoitik politika utzi eta Mexikora joan zenean, 2013an, zerrendako laugarrenak, Carlos Olazabal, uko egin zion hutsunea betetzeari, bosgarrena zen Juana Iturmendiri lekua utziz. Marisa Arrue seigarrena izan zen zerrendan eta Javier Ruiz, zazpigarrena. Ezustean batak zein besteak Legebiltzarrari uko egingo baliote Cristina Ruiz eta Xabier Olabarrieta Bilbo eta Leioako zinegotzien txanda izan liteke. Bestalde, PPk oraindik ez du argitu Iturmendik alderdiko exekutiban duen ardura ere utziko duen. Oraingoz, EAEko PPko Hauteskunde Batzordeko burua da.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun