Topatu.info gazte proiektu komunikatiboko hiru kide deklaratzera deitu ditu Espainiako Auzitegi Nazionaleko Eloy Velasco epaileak, webgunean bertan jakinarazi dutenez. Madrilera joan beharko dute urriaren 7an, Euskal Herrian deklaratzeko egindako eskaerari epaileak uko egin ostean. Ernaik 2013ko martxoan Urduñan antolatu zuen Gazte Danbadako ekitaldi politikoaz informatzeagatik deitu dituzte, "terrorismoari gorazarre" egin ziotela leporatuta. 2013ko martxoaren 29tik apirilaren 1era bitartean Gazte Danbada jaialdia ospatu zen Orduñan. Ekitaldi politiko nagusian hitza hartu zutenek espetxean hil zen Xabier Lopez Peña preso politikoa izan zuten gogoan, eta "terrorismoari gorazarre" egin ziotelakoan auzipetu zituen Velascok Ernai gazte antolakundeko hainbat kide. Tartean, Ernai gazte eragilearen Ernaiantolakundea.org webgunea ixteko agindua eman zuen Velascok, Lopez Peña goraipatzen zelakoan. Horren harira, Aitor Ortuondo Ekostat Informatica SL Gorlizko enpresako langilea galdekatzea agindu zuen epaileak. Baina, azkenean, magistratuak atzera egin eta onartu zuen Ortuondo ez zuela ardurarik izan Ernai gazte antolakundearen webgunean eta, beraz, "terrorismoa goratze" delitua leporatzeari utzi zion. Argazkian, Topatu.info-k plazaratutako salaketa kartela / cc-by Topatu.info.
2014ko martxoan Auzitegi Nazionalak ekitaldiko hitzartzeak eta laburpena biltzen zituen bideoak ezabatzeko agindu zien Topatu.info gazte proiektu komunikatiboko lagunei, eta "agindua prentsa askatasunaren aurkako eraso bat iruditu arren, bideoak ezabatu genituen", kasu egin ezean webgunea itxiko zutela mehatxu egin baitzieten. Orain, epailearen agindua bete arren, proiektuko hiru kide auzi berean sartu dituzte, bideoak grabatzeagatik "terrorismoa goratu" dutelakoan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun