Hainbat kazeta Europa Press albiste agentziaren iturriak aipatuz zabaldu dutenez, atzo kendu zuten Algortako Villaondoeta, Iparbide zein Ibaizabal kaleen eta Makaletako Etorbidearen arteko gunean agertutako plaka. Hala ere, ez dute zehaztu "garbiketa" Ertzaintzak, udal langileek edo bestelakoek egin duten. Marisa Arrue Getxoko PPren bozeramaileak herenegun eskatu zion Imanol Landa alkate jelkideari aurreko egunetan agertutako Eustakio Mendizabal Benito "Txikia" ETA erakundeko kidea, poeta eta euskaltzalea zena gogoratzen zuen errotulua "berehala" kentzea. Europa Pressek dioenez, eskaera berbera egin zuen Covite Terrorismoaren Biktimen Euskal Herriko elkarteak eta, horretaz gain, Espainiako Auzitegi Nazionalean salaketa aurkeztuko zuela iragarri zuen, "terrorismo goratze delitua izan daitekeen egileak zeintzuk diren argi dezan eta horien erantzukizun penala zehaztu". Argazkian, egunotan agertutako errotulua / © Getxoko PP.
Auzia ez da berria. Dignidad y Justicia elkartearen eskaerari jarraituz, Bilboko administrazioarekiko auzi-epaitegiaren 5. Aretoak 2009ko apirilaren 8an agindu zuen Eustakio Mendizabal Benito "Txikia" gogoratzen zuen plazaren plaka kentzea (1980ko maiatzaren 17an, Getxoko Udalbatzak "Txikia plaza" izendapena onartu zuen, EAJ eta HBko botoekin eta PSEren abstentzioarekin); eta Getxoko Udalak handik gutxira bete zuen agindua. Urte horretako apirilaren 27ko osoko bilkuran, berriz, PP eta PSE-EEren botoez onartu egin zen Txikia plazari izena aldatu eta "Bakearen plaza" izendapena jartzea. EAJk eta Ezker Batuak PPk aurkeztutako mozioaren kontra bozkatu zuten. "Azken izen hori onartzeko ezetzak izenik gabe utzi du plaza", dio Arruek. Eustakio Mendizabal "Txikia" 1973ko apirilaren 19an hil zuen handik gertu Espainiako Poliziak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun