Hamabost urteko espetxe zigorra Algortan maiatzean izandako hilketa egotzitako gaztearentzat
Bizkaiko Lurralde Auzitegiak 15 urteko kartzela zigorra jarri dio 26 urteko I.O.C. gizonezkoari, Algortako Bizkerre kale inguruko etxabe batean egindako festan izandako borrokan, 20 urteko beste mutil bat hiltzea egotzita. Gertaerak 2013ko maiatzaren 5eko goizaldean izan ziren, baina joan den irailaren 15ean hasi zen epaiketa, Europa Press albiste agentziak zabaldu duenez. Herri-epaimahaiak gaztea erruduntzat jo zuen aldeko zortzi botorekin eta kontrako bakarrarekin. Fiskaltzaren eta akusazio partikularraren arabera, akusatuak biktima guraize batzuekin sastatu zuen. Epaimahairen erabakiaren ostean, Ministerio Publikoak akusatuarentzat 14 urteko espetxe-zigorra eskatu zuen hilketa delitu batengatik. Bestalde, 20 urteko kartzela-zigorra eskatu zuen akusazio partikularrak. Azkenik, defentsak absoluzioa eskatu zuen. Argazkian, Getxoko udaltzainak hilotz bat zaintzen artxiboko irudian.
2013ko maiatzaren 5ean, goizeko 6:30ak pasata, Getxoko Udaltzaingoa Bizkerre kalean bertaratu zen inguruan liskar bat izan eta gazte bat arma zuriz zauritu zutela jakitean. 20 urteko mutila oso larri aurkitu zuten. Ondoan zen DYA elkarteko zenbait medikuk gaztea artatu zuten, baina ezin izan zuten gaztea berpiztu eta ordubete ondoren hil zela baieztatu zuten. Getxoko Udaltzaingoak lekukotasunak bildu eta beste mutil bat, 25 urtekoa, atxilotu du, heriotzarekin lotura duelakoan. Ertzaintzak ikerketa abiatu du eta lehenengo datuen arabera, atxilotuak biktima zauritu du artaziez joz.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun