Atzo arratsaldean, Getxoko ertzain-etxeko agenteek, Durangoko ertzain-etxekoekin lankidetzan, hiru pertsona atxilotu zituzten indarkeriazko lapurreta batean parte-hartzea egotzita. Eusko Jaurlaritzaren Segurtasun Sailak zabaldutakoaren arabera, ertzainek auto bat atzeman zuten Iurretan eta haren barruan zeuden ustez urriaren 2an Gorlizko enpresa batean lapurreta egin zuten bi emakumeak eta gizona. Salatutako gertaerak aipatu ostegunean izan ziren, 17:00ak aldera, Sagastikoetxe industrialde gorliztarrean kokaturiko auto-garbiketarako lonja batean. Segurtasun Sailak dioenez, une horretan, gizon bat eta emakume bat agertu ziren enpresan, ibilgailu bat garbitzeko aurrekontu bat eskatzeko aitzakiarekin. Bi pertsonek negozioaren jabea entretenitzen zuten bitartean, beste emakumea pabilioian sartu zen eta dirua ebatsi zuen.
Egoeraz jabetuta, langilea korrika irten zen eta hiru pertsonak ibilgailu batean sartu eta enpresak irteteko duen bide bakarretik alde egiten saiatzen ari zirela ikusi zuen. Adierazitako langilea galtzada erdian kokatu zen, lapurrek alde egin zezaten saihesteko, baina ibilgailuak aurrera egin eta harrapatu egin zuen, eta haren aurrealdearen gainera erori zen lehenik, eta lurrera gero. Langileak zauriak jasan zituen eta ospitalera eraman zuten lesioak tratatzeko. Biktimak emandako datuekin abiarazitako ikerketaren ondorioz, ertzainek hiru pertsona atxilotu dituzte: 46 eta 29 urteko bi emakume, eta 20 urteko gizon bat, indarkeriaz eginiko lapurreta egotzita.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun