Ertzainek, ikerketak eta gero, egiaztatu dute atxiloak hamaika lapurreta-salaketekin zerikusia duela, Segurtasun Sailak dioenez. Horietatik sei iazkoak dira, bost, berriz, aurtengoak. Aurtengo salaketak Getxon, Gorlizen, Sopelan, Urdulizen eta Zierbenan egindako lapurretei dagozkie, eta iazkoak, berriz, Zierbenako txaboletan eta baratzeetan egindako lapurretei.
Algecirasen
Iragan apirilean, Espainiako Poliziak atxilotu zuen Algecirasen errezibitze-delituagatik. Izan ere, bere furgonetan lanabes ugari aurkitu zituzten: bost lixagailu, bederatzi zulagailu, bost erradial, hiru inguratzeko zerra, hamalau sega-makina, sei soldatzeko makina, sei ekipo elektrogeno, lau pintura-punpa, sei motozerra eta bestelako lanabesak.
Atxilotuak honelako nekazaritzako materiala lapurtzen omen zuen: sasiak kentzeko makinak, motozerrak, belarra mozteko makinak, zulagailuak, rotaflexak, mota guztietako kableak, elikadurako gaiak, telefono mugikorrak, apaingarriak, brikolajeko erremintak, etab. Horien guztien balioa ez da zehaztu, baina handia da.
Polizia iturriek diotenez, herritarren lankidetza ezinbestekoa gertatu da atxiloketa egiteko. Hala, Ertzaintzak dei egiten die herritarrei, Uribe Kostako landa-guneetan pertsona edo ibilgailu susmagarririk hautemanez gero, abisu eman dezaten Ertzaintzaren Getxoko egoitzan, telefono honetara deituta: 944 063 420 edo, bestela, Sos Deiak 112 telefonora deituta.
Gizon bat atxilotu dute Uribe Kostan baratzeko lanabesak lapurtzea leporatuta
Iragan astelehen goizean 36 urteko gizon bat atxilotu zuen Ertzaintzak, baratzeko lanabesak gordetzeko Uribe Kostako hainbat txaboletan, gutxienez hamaika nekazaritza tresna lapurtzea egotzita. Eusko Jaurlaritzaren Segurtasun Sailak zabaldutakoaren arabera, Polizia Autonomikoak urte hasieran jakin zuen, herritarrei esker, Berango, Getxo, Plentzia, Sopela eta Urdulizko txaboletan lapurretak ugaritu egin zirela. Hori horrela, ikerketa abiarazi zuen. Ertzaintzak jakin zuen ustezko egilea gizonezkoa zela eta furgoneta txuri bat erabiltzen zuela. Furgoneta bilatzeko lanei ekin zioten eta, joan den urriaren 3an, Bilboko Larraskitu kalean aurkitu zuten. Agenteek egiaztatu ei zuten furgonetaren barnean objektu handi samarrak zeudela, olana batez estalita. Ondoren, ertzainek furgonetaren gidaria topatu eta furgoneta miatu zuten. Sasiak kentzeko makina, motozerra, zulagailu kolpekaria, disko-makina, hiru kable luzagarri, alanbike bat, bi bota pare eta mendiko soka bat aurkitu zituzten, baina gizonak ezin izan zuen horren guztiaren jatorria egiaztatu eta beste pertsona batek bere autoaren giltza izan zezakeenaren aitzakia eman zuen. Horiek horrela, Getxoko ertzain-etxera joateko agindu zioten agenteek. Bertaratuta, ezin izan zuenez bahitutako objektuen jatorriari buruz azalpen sinesgarririk eman, eta objektuon jatorri ez-legezkoa egiaztatu ondoren, atxilotu egin zuten pasa den astelehenean. Atxilotua atzo, osteguna, geratu zen Getxoko guardiako epailearen esku. Hilaren 1ean eta 15ean agertu beharko du epailearen aurrean. Argazkian, nekazaritzarako tresnak / cc-by-sa Derio Nekazaritza Eskola.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun