“Euskal kulturaren eta Getxo bizilekutzat hautatu duten pertsonen kultura aniztasun handiaren arteko zubiak eraikitzean eta kultura arteko topaketak erraztean datza ekimena”, nabarmendu du Elena Coria Immigrazioko Unitateko zinegotzi arduradunak. Familiek, bazkaria partekatzeaz gain, beren errealitateez eta esperientziez mintzatzeko aukera ere izango dute, etxekoen arteko gune informalean. Horietan normalean harremanik ez duten eta erreferentzia generikoez eta estereotipoez ezagutzen diren pertsonak elkartu ahal izango dira. “Mintzatzeko, hobeto ezagutzeko eta herri berean bizi garen pertsonen arteko zubiak eraikitzeko guneak sortzera lagundu nahi da”, gehitu du zinegotziak.
Iaz 16 bazkari
Iaz Getxon bizi diren 130 pertsonak hartu zuten parte 16 bazkaritan. Horietan bertoko familiek mahaia partekatu zuten Filipinetako, Peruko, Bolibiako, Senegaleko, Argentinako, Ekuadorreko, Rumaniako eta Uruguayko familiekin. Esperientzia iaz azaroaren 17an egin zen, egun berean, Europako hainbat tokitan. EAEn (Getxon, Basaurin, Bilbon, Ermuan eta Gasteizen) guztira 200 familiek eta 100 dinamizatzailek hartu zuten parte, orotara, 800 bat lagunek.
Getxoko zein atzerritik etorritako familiak batuko dituzte bigarrenez mahaiaren inguruan
Azaroaren 23an izango da “Bizilagunak” ekimenaren bigarren edizioa Getxo udalerrian. Egun horretan hainbat mahairen inguruan euskal herritar, familia eta atzerritarrak elkartuko dira elkarrekin bazkaldu eta harremanak sendotzeko. Getxoko Udalak, Egizu Getxo Euskaldun elkarteak eta Getxoko Etorkinak plataformak antolatzen dute ekimena, duela hiru urte Gipuzkoako SOS Arrazakeriak martxan jarritakoarekin bat eginez. Orain dela bederatzi urte Txekiar Errepublikan sortu zen ekimena. Bazkariak parte hartuko duten familien etxeetan izango dira eta topaketa bakoitzean bertoko familia bat, atzerritik heldutako familia bat eta bazkaria antolatzen lagunduko duen dinamizatzaile bat elkartuko dira. Bazkari bat partekatzeko edo dinamizatzaile izateko pertsona interesatuek izena eman beharko dute www.getxo.net/bizilagunak helbide elektronikoan. Familia parte hartzaileek aste bete geroago, Bizilagunak jaian parte hartu ahal izango dute Donostiako Victoria Eugenia Antzokian, EAEko familia guztiekin. Argazkian, iazko edizioan egindako bazkarietako bat / © Getxoko Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun