Erandion Euskaraz Berbots-ek, Egizu Getxo Euskaldun-ek eta Bizarra Lepoan Getxoko euskara elkarteak gaur Derion ospatuko den Topa Egunera hurbiltzera gonbidatu dituzte eskualdeko euskaltzaleak. Izan ere, "Ein daigun topa!" lelopeko ekimena herriz herri antolatutako euskaltzaleen topaguneetan parte hartzen duten euskaltzale guztiei dago zuzendua eta lemak dioenez, euskaltzaleon, auzolanaren eta mugimenduaren alde topa egiteko jai eta truke-eguna izango da. Gaurkoa hirugarren edizioa izango da eta egunaren antolakuntzan Euskaltzaleen Topaguneaz gain Derioko Tximintx elkartea eta Bizkaiko hainbat euskaltzale elkarte aritu dira. Garrantzia berezia emango diote jai-giroa eta kideen arteko esperientzien trukea eta hartu-emana uztartzeari. Argazkian, Gibelurdinek taldeak amaiera emango dio Topa Egunerari.Egitarau zabala
Goizeko 10,30etan ekingo diote Topa Egunari, ekitaldi berezi baten bidez. Izan ere, Tximintxeko kideek azaldu dutenez, 15 urte barru "euskararen egoera nola amesten dugun idatzi eta lur-azpian 'erein' egingo ditugu ametsok", 2029ko irailean ereindakoaren fruituak zenbateraino bete diren jakin ahal izateko.
11etatik aurrera esperientzien trukegunea jarriko dute martxan Kultur Birikan. Eta zer aurkituko dugu bertan? euskaltzaleen elkarteko bederatzi esperientzia, mugimendu feministaren beste esperientzia bat eta gazte topaldia.
Baina goizak, esperientzien trukerako aukera emateaz gain, gozamenerako aukera ere emango du. Derioko kaleetan zehar izango dira umeentzako tailerrak, bertoko musikariak, kantujira, Lasarteko batukada, Erandioko kilikiak, Txorierriko txakolin eta Boga garagardoaren dastaketa eta talo jana.
Ibilaldi gidatu berezi bat ere izango dugu. Derion egonik, kanposantutik txangoa egiteak merezi du, zenbait bitxikeria eta altxor aurkitu baitaitezke bertan.
Dantzan amaituko dute goiza, Derioko plazan Larrain dantzaren doinuan. Bazkarirako tartea izango da ondoren, frontoian, gutxienez aurretik izena eman dutenentzat. Bazkaldu ondoren, kultur gindak izango dituzte: kantua eta bertsoak. Eta ordu berean, haurrekin familia giroan hurbiltzen direnek Irrien Lagunekin hitzordua izango dute.
Arratsaldeko seietan izango da Topa Eguneko ekitaldi nagusia, frontoian bertan eta ondoren, musikak hartuko du eguneko azken txanpa. Lehenenik erromeria, Fan&go taldearekin (bitartean elektrotxarangak musikaz bustiko ditu Derioko kaleak) eta, ondoren kontzertua, Zizka Mizka eta Gibelurdinek taldeekin.
Topa Egunerako bideo deia (© Tximintx Derioko euskara elkartea eta Euskaltzaleen Topagunea)
Topa Eguneko egitaraua
