Literatura gustuko dutenek ekimen interesgarri bat izango dute Sopelan urritik abendura arte. Udalak martxan jarri du “Sopelan literaturaz solasean” egitasmoa, eta horri esker, hilero idazle bat joango zaie bere lan baten inguruan solasean. Hitzorduak Kurtzio kultur etxean jarri dituzte, 19:00etan, eta euskal literaturako idazleak izango dira protagonistak. Ekimenaren helburua euskal literaturari bultzada ematea eta jendarteratzea da, tokiko arduradunek azaldu dutenez. Gainera, hitzaldien bidez, eta bertaratutakoen artean interesa egongo balitz, Sopelan irakurleen klub bat sortzeko aukera aztertuko litzateke. Ostegun honetan, urriak 16, izango da lehenengo saioa, Danele Sarriugarteren “Erraiak” lanarekin. Bigarrena, berriz, Iban Zalduaren “Inon ez, inoiz ez”, azaroaren 11n. Eta azkenik, abenduaren 18an Bernardo Atxagaren “Nevadako gauak” eleberria izango dute aztergai. Argazkian, Bernardo Atxaga da hitzaldia eskainiko duen idazleetako bat / cc-by HUHEZI (Mondragon Unibertsitatea).
Danele Sarriugarte gazteak Igartza saria eskuratu berri du eta ikuspegi berritzailea eskaini dio euskal literaturari. Iban Zalduak, berriz, Euskadi Saria irabazi zuen iaz eta batez ere ipuin liburuak idatzi ditu orain arte. Azkenik, aurkezpenik behar ez duen idazlea da Bernardo Atxaga. Aurtengo Euskadi Saria eskuratu berri du.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun