Getxoko Udaltzaingoak emakumeenganako tratu txar delitua egotzi dio 27 urteko gizonezko bati, 21 urteko bikotekide ohiari muturrekoa eman diolakoan. Udal getxoztarreko iturriek prentsa ohar bidez zabaldu dutenez, gaur goizaldeko 2:45 aldera izan dira gertaerak, Areetako kale batean. Orduan adierazi die emakumezkoak udaltzainei, minutu batzuk lehenago, eztabaida izan duela bikotekide ohiarekin eta horrek jo egin duela. Laster batean osasun etxera eraman dute andrea tokiko poliziek, bertan arta zezaten; masailean kolpea baitzuen. Handik gutxira topatu dute ustezko erasotzailea eta Guardiako Epaitegira eraman, epaiketa azkarra egin ziezaioten. Argazkian, 2013ko azaroaren 25eko Emakumeenganako Indarkeriaren Kontrako Egunean, 50 bat lagunek egin zuten kontzentrazioa Algortako Telletxe plazan Bilgune Feministak deituta.
Halako gertakarietan ohi den bezala, Keltse Eiguren Berdintasun zinegotziak ustezko erasoa gaitzetsi du eta gogoratu du “indarkeria sexista giza eskubideen urraketa larria" dela; eta aldi berean, tratu txar fisiko edo psikiko jasaten dituzten emakume biktimak Gizarte Zerbitzuetara (944 660 151) jotzeko animatu ditu, "han egoeratik ateratzeko laguntza emango baitiete". Eigurenek gogoratu du Udaltzaingora (944 660 202) edo Ertzaintzara (944 063 420) ere joan daitezkeela, baita Eusko Jaurlaritzaren tratu txarren biktimen telefono zenbakira (900 840 111) eta SOS Deiak zerbitzura (112) deitu ere.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun