Udaltzaingoak auzokide batekin izandako jarreraz ikerketa nahi du Getxoko EH Bilduk
Joan den iraileko osoko bilkuran Algortako auzokide batek Getxoko Udaltzaingoak berarekin izandako jarrera salatu zuen Imanol Landa alkatearen aurrean. Emakumeak abuztuan udaltzaingoari dei egin zion kexu bat luzatzeko. Bere bertsioaren arabera, deiari erantzun zion udaltzainak ez zion "behar bezalako arretarik" eskaini eta "memelo bat bezala" tratatu zuen. Horrelako gertaerek zein aurretik salatutako beste zenbaitek "Gobernu Taldeak udaltzaingoaz egiten duen kudeaketa zalantzan" jartzen du, Getxoko EH Bilduren ustez. Horregatik, Lehendakaritza Batzordeko urriaren 21eko bileran aipatutako "auzokidearen deiaren inguruko ikerketa zabaltzea, udaltzaingoaren protokoloen eta funtzionamendu sistemaren inguruko azterketa egitea eta hurrengo komisioan ikerketaren emaitzak aurkeztu ditzala" eskatuko du koalizio ezkertiarrak. Argazkian, Getxoko Udaltzaingoaren komisariako koordinazio zentroa / © Getxoko Udala.
Gertaerekin jarraituz, hurrengo egunean, emakumea Getxoko Udaltzaingoaren egoitzara hurbildu zen telefonoaren beste aldetik erantzun zion udaltzainaren zenbakia hartu eta salaketa jartzeko asmoz. Auzokideak dioenez, komisarian ez zioten lagundu nahi izan, eta bere deia grabatu ez zela argudiatuz zalantzan jarri zuten benetan deitu zuen ala ez. "Udaltzaingoaren arduraduna den zinegotziak ere erantzun berdina eman zion aipatu bizilagunak idatziz aurkeztutako galderari. Udalak emandako erantzunaz kexu, osoko bilkuran azaldu zen, eta bizilagunak erabiltzen duen telefono konpainiaren faktura eraman zuen deia erregistratuta zegoela baieztatzeko", adierazi du Getxoko EH Bilduk. Alkateari berari eskatu zion kasua argitzeko eta erantzuleak zigortzeko.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun