Aurkezpena Sopelan
Sopelari dagokionez, urriaren 24an, ostirala, bi ekimen izango dira. Alde batetik, Udalak eta Emakundek martxoan abiatu zuten parekidetasun ezari zein Sopelako emakume gazteen premiei buruz egindako ikerketa parte hartzailea aurkeztuko dute jendaurrean. Saioa elebitan egingo dute, Kurtzio kultur etxean, arratsaldeko 7etan. Sopelako Udaleko Berdintasun Sailak gogoratu duenez, Sopelako emakume gazteen errealitatea ezagutzeko asmoz, Sopelako Udalak berdintasun-desberdintasun egoeren eta beharrizanen inguruko diagnostiko parte hartzailea egin du aurten, helburu bikoitzarekin. Alde batetik, emakume eta gizonen arteko aukera-berdintasunen aurrean emakume gazteek egiten dituzten eskaerak zeintzuk diren ezagutzeko. Bestetik, emakume gazte horien parte-hartze indibiduala eta kolektiboa bultzatuz, emakume gazte horien topaleku bat sortzea bultzatuz, desberdintasunen gainetik, batzen dituena lehenetsiz.
Diagnostiko hori egiterakoan emakume gisa kontzientzia handia duten gazte batzuekin lan egin dute. "Horri esker, lantaldeen ondorioetan genero ikuspegi argia egon da, aztertu diren eremu guztietan", ikerketaren arduradunek azaldu dutenez.
Azterketa horrek, gainera, emakumezko zein gizonezko gazte batzuei "kontzientzia pizten lagundu die, orain arte ez baitira guztiz jabetu emakume eta gizonezkoek pairatzen dituzten desberdintasunez".
Azkenik, ikerketa horrek emakume gazteek bizi duten errealitateen inguruko informazioa ematen du, "eta etorkizunean proposamenak bultzatzerako orduan oso kontuan hartzekoak izango dira".
Berdintasun Arlotik azpimarratu duten diagnostikoaren ondorioetako bat izan da Sopelak Jabekuntza Eskola bat behar duela. Hori dela eta, aurtengo ikasturtean abian jarriko dute aipatu eskola. Diagnostikoaren nondik norako guztiak urriaren 24ko hitzorduan azalduko dituzte.
Sopelako Jabekuntza Eskola
Izan ere, egindako azterketa parte hartzailearen emaitzak ezagutaraziko dituzten egun berean, urriaren 24an, martxan izango da lehenengo aldiz Sopelan Jabekuntza Eskola. Arratsaldeko 6etatik 9etara, Kurtzio kultur etxeak ostiralero hartuko ditu Mujeres Imperfectas elkarteak dinamizatutako eskola, gutxienez ekainera arte. Dagoeneko, 16 emakumek eman dute izena, "abentura eder eta aberats honetan". Sopelako Udaletik oso era baikorrean baloratu dute ekimena: "Berdintasunaren alde batzuek pausuak ematen dituztenean danok irabazten dugu".
Gorliz, Berango eta campusa
Halere, Getxo eta Sopela ez dira Emakunderekin batera parekidetasunaren aldeko jardueretan murgildutako eskualdeko udalerri bakarrak. Izan ere, Gorlizen, Sertutxenan, pasa den ostiralean Hiri Antolamendurako Plan Orokorra (HAPO) izan zuten hizpide, testuan generoaren ikuspegia gehitzeko. Pasa den asteartean, ordea, hezkuntza gune ez formaletan hezkidetza sustatzeko estrategiak aztertu zituzten Berangoetako kultur etxean. Azkenik, gaur goizean, unibertsitatean parekidetasunaren bidean sumatutako erronkak aztertu dituzte EHUko Zientzia eta Teknologia Fakultatean. Jardunaldia sexu-aniztasuna eta genero-indarkerian zentratu da.
Etzi, larunbata, eta hilak 24, ostirala, emakume eta gizonen arteko berdintasuna sustatzeko jarduerak izango dira Algortan eta Sopelan, hurrenez hurren. Ekimenak, Emakundek koordinatutako XI. Berdintasunerako Gunearen barruan kokatzen dira, "Berdintasunarekin aurrera goaz. Eman pausoa" leloa hartuta. Besteak beste, EHUk, hainbat emakume elkartek eta Berango, Gorliz eta Sopelako udalek sustatzen dute kanpaina. Algortari dagokionez, etzi, larunbata, arratsaldeko 5:30ean zabalduko dute autobusa Telletxeko plazan. Bertan, Mujeres con Voz elkarteak eta Biltzen atzerritarren arloko informazio, prestakuntza eta lege-aholkularitzako zerbitzuak antolatuta, Jeanne Rolande Dacougna Minkette-k emango du "Proceso de empoderamiento. Un paso hacia la igualdad" izeneko hitzaldia, espainolez. Feminista senegaldarra Filologia Hispaniarrean doktore eta irakaslea da eta Genero eta Berdintasun Masterra dauka. Biltzenen egiten du lan eta Garaipen Donostia eta Oreretako emakume elkarteko zein SOS Arrazakeriako kidea da. Ekimenaren xedea elkartera iritsi berri diren emakume etorkinei ahalduntzea zer den azaltzea da. Horrekin batera, esperientziak partekatu eta norberaren zein taldearen gaitasunak hobeto ezagutzea nahi dute, norberaren bizitza eta emakumeak azpian jartzen dituzten gizartearen egiturak aldatzea helburu. Argazkian, Dacougna andrea / © Berria.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun