Uribe Kostako berbalagunek aukera izango dute datorren urriaren 26an, igandea, eskualdeko salda preziatuak probatzeko, garagardoak eta txakolinak edateko, alegia. Izan ere, hilaren amaieran izango dute udazkeneko lehenengo berbatxangoa; oraingoan, Urdulizko Etxeandia garagardo-etxea eta Gatikako Butroi upategia bisitatuko dituztela, garagardoa eta txakolina zelan egiten diren ikasi, ikusi eta dastatzeko. Egizu!-ko kideek azaldu dutenez, 25 leku baino ez daudenez ahalik eta lasterren izena eman behar da. Interesatuek 5 euro ordaindu beharko dituzte, trukean autobus bidaia eta bi dastaketa gidatuak eskuratuko dituztela. Aldez aurretik izena eman daiteke honako elkarte eta bitartekoen bidez: Erandio (berbots@gmail.com / 630 404 170), Sopela (aitxuizuba@gmail.com / 603 894 364), Getxo (egizugetxo@gmail.com / 644 277 155). Berbatxangoak Erandioko Berbots, Sopelako Aitxu! eta Getxoko Egizu! elkarteen artean antolatzen dituzte, "eskualdeko ondarea, euskara eta euskal kultura sustatzeko". Hurrengo hitzordua azaroaren 16an izango da, igandea, eta “Uribe Kostako elizak” izango ditu berbagai Jesus Muñizek. Argazkian, lagun bat txakolin dastaketa batean / cc-by Egizu!.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
