Getxoko Udalak eta Bilboko Merkataritza Ganberak udalerriko saltokiei, ostalariei eta ostatu arloko establezimenduei gonbidapena bidali diete, enpresa-transmisio prozesu batean parte hartzeko interesa izan zezaketelakoan.
BERRIZ-Enpresa
BERRIZ-Enpresa ekimen aitzindaria da EAEn. Programaren helburua, transmisio-prozesu bati arretarik eman ezin dioten enpresak itxi behar izatea saihestea da, horiekin batera inguruan jarduera ekonomikoa eta kalitateko enplegu asko gal ez daitezen. Eusko Jaurlaritzaren eta eusko ganberen datuen arabera, Araba, Bizkaia eta Gipuzkoan txikizkako 26.000 saltokien eta turismo-enpresen %20-25a egon daitezke interesaturik transmisioa egitean. Nolanahi ere, programa jardueraz aldatu nahi duten guztientzat ere aktibatu da, arrazoiak edozein izanik ere.
Hasiera batean hiru eskualdetan abiaraziko da programa, hiru lurraldeetan bana, eta eremu berrietara zabalduko da datozen urteetan. Gaur egun, Bizkaiko Eskumaldean 6 enpresa ari dira lanean transmisio eranginkorra lortzeko; Tolosandean (Gipuzkoa) 11 dira eta Vitoria-Gateizen (Araba) 7, azaldu dutenez.
Asteazken honetan, urriak 22, Getxolaneko egoitzan, enpresa baten itxieraren edo transmisioaren aurrean gakoak izan daitezkeen gaiei buruzko informazio hitzaldia egingo da. Bertan, Eusko Jaurlaritzak euskal merkataritza ganberekin eta hainbat entitate laguntzailerekin batera martxan jarri duen BERRIZ-Enpresa programa zehatz-mehatz azalduko dute. Ekimen horren helburua, Merkataritza, Turismo eta Ostatu arloetan enpresa-transmisio prozesuetan tutoretza osoa eskaintzea da, negozioaren jarraipenaren arrakasta eta lanpostuak mantentze aldera, udal iturriek azaldu dutenez. Solasaldia Jose Angel Almuzara ACKS Grupo Asesor enpresako kideak eskainiko du, 14:00etan, Getxo Elkartegian (Ogoño kalea 1, Areeta). Argazkian, Areetan paratutako elkartegian dago Getxolan / © Getxoko Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun