"Udaletan Berdintasuna Integratzen" deritzon ildo estrategikoa da "berdintasuna" ezartzeko esku-hartzea indartzeko beste jarduketa batzuk (ildo tematikoa eta udalez gaineko ildoa) biltzen dituen eremua, Bizkaiko Foru Aldfundiak azaldu duenez. Aurten burututako ekintzen artean aipatu dituzte generoaren ikuspegia sartzeko prozesuak, horretarako udal politikari eta teknikariekin hainbat bilera egin direlarik, bilera teknikoak eta politikoak, hain zuzen ere.
Garatutako lan-ildoetan hainbat arlo landu dira: hizkuntza eta irudiak, adiskidetzea eta zerbitzuen erantzunkidetasuna, genero-plangintza, aurrekontuetako genero-ikuspegia edo lanpostuetako genero-ikuspegiaren zeharkakotasuna, besteak beste.
Berdineskola
Landutako ekintzen artean, "jaietan berdintasuna lantzen" deritzona aipatu dute foru arduradunek. 2012an abian jarritako ildo tematiko bat da, "jaietan berdintasuna kontuan hartzeko" tresnak jai-batzorde eta udalekin kontrastatzeko aukera ematen duen ekintza pilotu bat, hain zuzen ere. Beste ildo batek, "Mankomunitateetatik lanean" izenekoak, mankomunitateen artean topo egitea ahalbidetu du, mankomunitateek udalerri txikietan berdintasunari nola heltzen dioten ezagutarazteko.
5.000 biztanle baino gutxiagoko Bizkaiko udalerri guztiek jaso dute Berdinbidean-ek eskaintzen duen informazio zerbitzua. Gainera, 123 kontsulta erantzun dira, on-line eta telefonoen bidez.
Eudel, Aldundia eta Emakunde ere bat etorri dira "berdintasuna lortzeko hiritarren partaidetza sustapena azpimarratzeko ahaleginetan". 2012an diseinatu zen udalerri txikietan berdintasuna sustatzeko Berdineskola eskolaren bidez, herritarren partaidetza bultzatu da eta Emakunderi ekintza-beharrizanak helarazi zaizkio.
Eudel EAEko udalen elkarteak eta Bizkaiko Foru Aldundiak, Emakunderen partaidetzarekin, lurraldeko udalerririk txikienentzako, hau da, 5.000 biztanletik beherako udalerrientzako (horien artean dira, Barrika, Lemoiz, Plentzia eta Urduliz), Berdinbidean Bizkaia Aholkularitza Zerbitzua sustatzen dute 2011ik hona. Zerbitzu horren bidez, berdintasunaren inguruko eskariei ematen zaie erantzuna eta esperientziak koordinatu eta trukatzeko erraztasunak eskaintzen dira. Bada, Aldundiko eta Bizkaiko mankomunitateetako (Uribe Kostakoa, tartean) ordezkariak gaur goizean batu dira, esperientzia desberdinak konpartitzeko eta dauden beharrizanen berri emateko. Gainera, gizonen eta emakumeen arteko berdintasuna lortzeko, udalez gaineko ahaleginak bultzatuko dituzte, foru iturriek adierazi dutenez. Argazkian, Uribe Kostako Emakumeen Kontseiluak egindako elkarretaratzea, artxiboko irudian / © Sopelako Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun