Tosu Betirako asanbladak egindako agerraldia
Martxaren kartela
Bihar, igandearekin, Getxo Lotsagarria Oinez izeneko txangoa izango da, Tosu Betirako asanbladak deituta. Martxa goizeko 10etan irtengo da Bizkaiko Zubitik eta hainbat eragileren babesa dauka. Besteak beste, EH Bildu koalizioa eta Podemos alderdia, LZPren Aurkako Asanblada, Auzokideok auzo elkarteen topagunea eta Ernai agertu dira ekimenaren alde. Bidean zehar, Itzubaltzeta / Romoko Kultur Etxearen hezurdura, ubidetik lantzean behin askatzen den Gobela ibaia, Larrañazubin dagoen zaborrak konprimitzeko planta, Hezetasun auzoa, Getxo Antzokia eta Tosuko ortu kolektiboak izango dituzte ikusgai. Puntu guztiak "erakundeek baimendutako hondamendiak" edota "porlana eta ormigoiaren biktima edo balizko biktima" dira, antolatzaileen arabera. Martxa bitartean, 13:00ak aldera, Usategin bazkaltzeko aukera izango da, norberak berea eramanda. Tosuko kanpaldira heldu ostean, arratsaldeko 5etan, txokolate jana izango dute. Martxa "lotsagarria" iragartzeaz gain, Tosu Betirako hainbat kidek agerraldia egin dute, orain arteko kanpaldiaren balorazioa egiteko. Biluzik eta, etxola bezala, lokatzak indartuta, negurako prest, inolako lotsarik gabe mintzatu dira. Erresistentzia gunetik pasa diren 300 lagun baino gehigori eskerrak eman dizkiete eta ospatu egin dute orain bi aste lortutako garaipena. Argazkian, Tosu Betirako asanbladaren kide batzuk.
Orduan, Viviendas de Vizcaya etxegintza enpresak, Eusko Jaurlaritzak eta Bizkaiko Garraio Partzuergoak Tosuko lurrak desjabetzeko asmoa zuten, horretarako Getxoko Udalaren babesa zutela, baina ekitaldia bertan behera utzi eta atzeratzera behartu zuen hainbat herritarrek egindako protesta. Hori azpimarratu dute Tosu Betirako asanbladaren kideek, komunikabide batzuek jabe txikien nahiari egokitu baitiote atzeratzearen ardura. Parkinaren aurkako bataila hori irabazi izanak ilusioa eta indarra eman die gerran jarraitzeko. Ildo horretan, kanpaldia aurrera jarraituko du eta astebururo auzolanak egingo dituzte, neguari aurreko egiteko prestaketak landuz. Horien artean, etxolak lokatzaz eta adobez indartzea. Era berean, Getxoko Hiri Antolamendurako Plan Orokorra (HAPO) eta "gutxi batzuen mesederako diren bestelako plan desarrollista guztiak" borrokatzeko deia egin dute.
Tosu Betirako asanbladak egindako agerraldia
Martxaren kartela
Tosu Betirako asanbladak egindako agerraldia
Martxaren kartela
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun