Azaroaren 8an Gure Esku Dagok mosaiko erraldoi bat egin gura du Donostiako Zurriola hondartzan. Hurrengo egunean, Katalunian izango da galdeketa. Ekimenean parte hartzeko aurrez izena ematea ezinbestekoa izango da, adierazi dutenez. Horretarako, Gure Esku Dago dinamikako batzordeek salduko dituzten txarteletako (5 euro) bat erosi beharko da. Horren truke mosaikoan erabiliko diren petoa eta aterkia eskuratu ahal izango dira. Ezinbestekoa izango da Zurriolara txartel hori eroatea. Bada, Algorta-Getxoko taldeak Telletxen jarriko du horiek saltzeko mahaia, ondorengo egunetan: ostiral honetan (urriak 24), 18:00etatik 20:00etara; larunbatean, 12:00etatik 14:00etara; urriaren 31n, 18:00etatik 20:00etara; eta azaroaren 1ean, 12:00etatik 14:00etara. Sopelan (udaletxe aurrean) eta Erandion ere asteburu hau (larunbat eta igandea) baliatuko dute txartelak banatzeko. Azken horretan, Astrabuduan jarriko dute informazio puntua etzi eta Altzagako Jado kalean etzidamu, beti ere eguerdian. Azkenik, Leioan, urriaren 30ean eta azaroaren 4an (19:30-21:00) jarri dituzte hitzorduak, Sakoneta kiroldegian. Argazkian, ekainaren 8ko Durango eta Iruñea arteko jende katean 150.000 lagunek hartu zuten parte, tartean 5.000 bat uribekostarrek.
Gainera, autobusak ere antolatuko dira. Algorta-Getxoko taldeak zabaldu duenez, autobus plazak erreserbatzeko derrigorrezkoa da Telletxen jarriko dan mahaitik pasatzea. 7 eurotan aterako da bidaia Algortatik. Autobusak azaroaren 8an, goizeko 9etan irtengo dira Telletxe ingurutik eta buelta 14:00etan Donostiatik. Mosaikoa 12:00etan egingo dan arren, 11:00etan simulazioa egingo da. Sopelan asteburu honetan "autobus tokiak bete" ere egingo dituzte. Eta Leioan buserako txartela 10 eurotan egongo da nagusientzat eta 5 eurotan umeentzat.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun