Miren Josune Ariztondo Kultura foru diputatuak atzo adierazi zuenez, "Ramiro Pinilla bizkaitarra ereduzko idazlea da letren munduan, eta beti izango dugu gogoan, gure haran berde eta mendixka gorrietatik". Getxoztartutako bilbotarra atzo goizean zendu zen Gurutzetako ospitalean, 91 urte zituela. Pinillak bi aste baino gehiago zeramatzan ospitalizatuta, pankrean pairatzen zuen infekzioa zela eta. Herenegun ebakuntza egin behar izan zioten baina idazleak ez zuen gainditzea lortu. 1923an Bilbon jaioa, azken hamarkadatan Getxoko Walden baserrian bizi zen. Ramiro Pinillak Euskadi Literatura Saria, Kritikaren Saria eta Espainiako Narratibako Saria jaso zituen, "Verdes valles, colinas rojas" (2004-2005) trilogiarengatik, Bizkaiko Foru Aldundiak azpimarratu duenez. Nadal saria eta Kritikaren Saria ere jaso zituen, "Las ciegas hormigas" lanarengatik (1960koa, 2010ean berriro argitaratua). Halaber, Planeta Sariaren finalista izan zen 1971n, "Seno" obrari esker. Idazlearen hil-beila 20:00etara arte izango da gaur, Getxoko Ollarretxe kaleko tanatorioan. Argazkian, Ramiro Pinilla zena / cc-public domain Ganix33.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun