Ertzaintzak indarkeriazko lapurreta eta iruzur delitu bana egotzi die 23 eta 29 urteko bi gizonezkori, urriaren 10ean, Getxon, emakumezko bati "tira eginda" poltsa ostu eta ondoren 32.000 euro kontu korrontetik atera zizkiotelakoan. Dirudienez, beste emakume bat konbentzitu zuten gaizkileek, substantzia estupefazienteen truke biktimaren lekua hartzeko. Aipatu andrea hilaren 15ean atxilotu zuen Guardia Zibilak Kantabrian, ustez emakume getxoztarraren kontu korrontetik diru gehiago ateratzen saiatu ostean, Santoñako banketxe batean. Gizon bietako bat asteazkenean atxilotu egin zuen polizia autonomikoak. Eusko Jaurlaritzaren Segurtasun Sailak zabaldutako bertsioaren arabera, gaizkileetako batek eraso zuen biktima besteak ibilgailuan itxaroten zion bitartean. Lurrera bota ere egin zuen emakumea eta, ondorioz, ospitalera eraman behar izan zuten, eskuan eta zangoan zituen zauriak sendatzeko. Ibilgailuan ihes egin zuten lapurrek.
Lekukoek emandako susmagarrien zein ibilgailuaren deskribapenaren ostean, ikerketa abiatu zuen Ertzaintzak, indarkeriazko lapurretaren egileak identifikatzeko. Horretaz gain, beste emakume batek biktimaren lekua hartu zuela jakin zuten, poltsan zeraman dokumentazioa erabilita, Kantabriako hainbat sukurtsaletan dirua ateratzeko. Orotara, 32.000 euro.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun