Gaur arratsaldean 88 urteko gizonezko bat zendu da Sopelan, ematen duenez Barinatxe hondartzara jaisteko bidezidorretik zihoala erorikoa izan ostean. Jasandako zaurien larritasunagatik eta zonaldearen orografiagatik (%60ko desnibela dauka mendi magalak), Ertzaintzaren Zaintza eta Erreskate Unitatea, helikoptero bat eta mendiko erreskate taldea ere bidali behar izan dute. Eusko Jaurlaritzaren Segurtasun Sailak zabaldutakoaren arabera, 14:25 aldera izan da gertaera. Ordu horretan jaso dute abisua SOS Deiak zerbitzuan eta berehala abiatu dituzte erreskate lanak. Agurea eroritako lekura heltzea zaila zenez, bertaraino helikopteroz jaitsi behar izan dituzte larrialdietako langileak. Hala ere, horiek gizonaren heriotza baieztatzea besterik ezin izan dute egin. Erreskatatu ostean, Getxoko 88 urteko bizilagunaren gorpua Bilboko Auzitegi Patologia Zerbitzura eraman dute, epailearen aginduz. Argazkian, Ertzaintzaren helikopteroa artxiboko irudian / cc-by Irekia.net - Eusko Jaurlaritza.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun