Egunez egun
- Azaroak 6. "Historiaren atarian" izeneko dokumentala ikusi ahal izango da. Horretan euskararen jatorriari buruz dauden zalantzak, tesi nagusiak, iritziak eta datu jakinak ikusi ahal izango dira.
- Azaroak 13. "Erromako Inperioa" proiektatuko da. Horrek erromatarren etorrerak euskaran eragin zituen aldaketak (latina nagusitu zen) agertuko dira eta baita sasoi horretakoak direla euskarazko lehen aipu idatziak ere.
- Azaroak 20. "Aniztasunaren bidean" lana ikusi ahal izango da eta horretan Erdi aroan penintsulan izandako inbasioek eragin zituzten ondorioak aipatuko dira, esate baterako, latinaren indarra leundu zela, eta Euskal Herria hizkuntza eta kultura aniztasunaren bilgune bihurtu zela.
- Azaroak 27. "Mugetan gaindi" proiektatuko da. Horretan aipagai izango da Frantziak eta Espainiak mugak finkatzeak euskararen komunitatea bitan banatzea eragin zuela, ondorioz gutxiagotze-prozesuan sartuz. Horrekin batera, baleazaleak eta itsaso arteko bidaiek ekarri zituzten bitxikeriak ere ezagutu ahal izango dira.
- Abenduak 4. "Gerren arteko pizkundeak" izeneko dokumentalak erakutsiko du Iraultza Frantsesak eta Foruak galtzeak hizkuntzaren beste atzerakada bat ekarri zutela. Hala ere, XX. mendearen hasieran euskarak beste berpizkunde txiki bat izan zuen kultur mugimendu erromantikoari esker.
- Abenduak 11. "Mundua osatzen" azken dokumentala izango da eta horretan 36ko gerrak eta frankismoak eragindako urte ilunak aipatuko dira eta baita hemendik aurrerako erronka berriak eta hainbat klabe ere.
Azaroaren 6tik abenduaren 11ra arteko ostegunetan, euskararen jatorriari buruzko Euskara Jendea zikloaren sei proiekzio izango dira Algortako kultur etxean, Villamonten, Getxoko Udalak antolatuta. Egun bakoitzean euskararen historiaren garai desberdinen berri emango da, bere jatorritik egungora arte. “Euskararen jatorria eta garapenari buruzko ikuspegi zabala eta landua ikusteko aukera ezin hobea izango da, aurrerantzean eman beharreko urratsak finkatzeko oso baliagarria izan daitekeena”, nabarmendu du Koldo Iturbe Euskara zinegotziak. Dokumental bakoitzak garai bakoitzean adituak diren pertsonen partaidetza eduki du. 40 minutuko iraupeneko proiekzioen ondoren, solasaldi bat izango da, Hibai Castro dokumentalen zuzendariaren partaidetzarekin. Proiekzio guztiak euskaraz eta doakoak izango dira eta 19:30ean hasiko dira. Argazkian, Hibai Castro dokumentalen grabaketa lanetan / © Euskara Jendea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun