Dena den, biharkoan hamaika nobedade izango dira, tartean Euskal Herriko eta munduko ehunka mila euskaltzale mugitzen dituen bi mila kilometro luzeko esprinta nondik irtengo den, zein izango den aurtengo leloa, zein kantak alaituko dituen errepideak, kaleak zein tabernak... eta abar luze bat. Beranduago, jakingo da Korrika Uribe Kostatik noiz igaroko den eta, iaz ez bezala, aurten Lemoiz bisitatuko duen. Ekitaldia bere xumean zuzenean ikusteko parada izango da, bai Korrika.org webgunean eta baita Eitb.com-en ere.
"Korrika badator!" bideoa (© Korrika / AEK)
Bihar, osteguna, Korrika euskararen aldeko lasterketaren 19. edizioa aurkeztuko dute AEK eta herri ekimeneko arduradunek. Ekitaldia Bilboko Arriaga antzokiko sarreran egingo dute, goizeko 11etan. Korrika 19ko antolatzaileek jakinarazi dutenez, aurkezpenean izango dira, besteak beste, AEK-ko Artezkaritza Kontseiluko kideak, Mertxe Mugika AEKren koordinatzaile nagusia eta Asier Amondo Korrikako arduraduna. Bilbon ezagutaraziko duten datu andanaren zati txiki bat jada jakina da. Izan ere, Edurne Brouard Korrikako arduradun ohiak Durangoko Sanagustin aretoko "Aho bizarrik gabe" solasaldian pasa den uztailean gogoratu zuenez, Korrikak beti bukatu du bere ibilbidea Aberri Egunaren aurreko igandean eta, azken urteotan, 11 egun iraun ditu. Hortaz, martxoaren 19an irten eta 29an amaituko da aurten arineketa erraldoia. Bestalde, amaiera tokia txandaka izaten ohi da Hego Euskal Herriko lau hiriburu eta Baionaren artean eta, ohiturari jarraiki, Bilbori dagokio helmuga izatearen ohorea. Halere, Brouardek berak aitortu zuenez, azken hori ez da araua eta ez da zertan bete behar. Irudian, Korrikak zabaldutako deialdia / © Korrika / AEK.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun