"Lasa eta Zabala" filmaren sinopsia
1983ko urria. Joxean Lasa eta Joxi Zabala euskal errefuxiatuak Baionan desagertu dira aztarnarik utzi gabe eta, jarraian, GAL deritzonaren atentatu andana bati hasiera emanez. Iñigok, senideen abokatuak, uste orokorrari aurre egin beharko dio laster: baliteke bi gazteak sekula berriro ez agertzea.
1995. Hamabi urte igaro dira. Jesus García Alacanteko poliziak, GALi buruz aditzera eman diren zertzeladak direla eta, kasu zahar bat irekiko du berriro, erailda eta kare biziz lurperatuta agertu ondoren hamar urtez identifikatu gabe egon diren bi gorpuak Joxean eta Joxirenak izan daitezkeela susmatuz.
Gorpuak etxeratu eta Tolosan lurperatuak izango dira, tentsio handiko giroan hara bildu diren ertzainekin. Handik laster sumarioa irekitzen denean, Iñigo eta Fede bere laguntzaile gaztea, epaile instruktorearekin eta fiskalarekin elkarlanean, Rodriguez Galindo Guardia Zibilaren koronelaren eta Elgorriaga gobernadore ohiaren inguruan ikertzen hasiko dira, hauek Joxean eta Joxiren bahiketan eta erailketan erantzukizuna badutela antzeman arte. Baina, hala frogatzeko bide luze eta bihurrian, botereari atxikita dauden etsaien joko zikinari aurre egin beharko diote, aldi berean euren barne gatazkak gaindituz eta bien biziak arrisku larrian jarriz.
Aurrerakina
Asteburu honetan, euskal gatazka hizpide eta ikusgai izango da Sopelako Kurtzio kultur etxean. Batetik, bihar, ostirala, "Ondorioen testigantzak. Giza eskubideak" izeneko dokumentala proiektatuko dute. Aipatu lana Ekimen taldeak, giza arazoen ikerketarako elkarteak, burutu du hainbat lekukotasun biltzen. Ikus-entzunezko lan hori gaztelaniaz grabatu da eta proiekzioan euskarazko azpitituluekin pantailaratuko da. Dokumental horren inguruan biharko ere berbaldia antolatu du Meñakoz kultur elkarteak. Hitzaldia "Euskal Gatazka, oinaze eta bizipenak" izendatu dute eta tituluak adierazten duen moduan Euskal Herrian bizi dugun gatazkaren ondorioei buruzko hausnarketa bat izan nahi du. 19:00etan izango da saioa. Larunbat eta igandeari dagokionez, Donostiako Zinemaldian estreinatu berri den "Lasa eta Zabala" pelikula ikusteko aukera egongo da Kurtzion, bi saio ezberdinetan. Etziko saioa 20:00etan izango da, eta Pablo Malo zuzendaria izango da bertan. Etzidamu, berriz, hitzordua 19:00etan jarri dute (igandean jatorrizko bertsioan izango da, euskaraz + gazteleraz). Sarrera debalde izango da. Hala ere, gonbidapena hartu beharko da aurretik Kurtzion, Sopelarin bulegoan edo udaletxean. Argazkian, "Lasa eta Zabala" filmaren fotograma bat / © Barton Films.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun