Hamahiru urte bete dira gaur, azaroak 7, ETAk Jose Maria Lidon Corbi Bizkaiko Auzitegiko Bigarren Aretoko magistratua Algortako bere etxeko garajean hil zuenetik. Hori dela eta, Bilboko Justizia Jauregian lore eskaintza egingo diote haren familiako kideek, lagunek eta lankideek. Eguerdiko ordu bata eta erdietan izango da ekitaldia. Bertan izango dira, besteak beste, Josu Erkoreka Eusko Jaurlaritzako bozeramailea eta Justizia eta Herri Administrazio sailburua, Jon Arturo Uriarte Justizia Administrazioko zuzendaria, Monika Hernando Biktimen eta Giza Eskubideen zuzendaria, Juan Luis Ibarra Euskal Autonomia Erkidegoko Justizia Auzitegi Nagusiaren presidentea, Manuel Ayo Bizkaiko Probintzia Auzitegiko ordezkari nagusia, Aner Uriarte Biloko Epaitegi Dekanoa eta Juan Calparsoro Fiskal Nagusia. Juan Mateo Ayala Jose Maria Lidonen laguna izan zenak omenaldian parte hartuko du. Lidon, Ayala eta Maria Jesus Erroba (hilda) lankideak ziren Bizkaiko Probintzia Auzitegiko Bigarren Aretoan. Familiak lore eskaintza egingo du urtero legez epailea gogoratzeko Justizia Jauregian jarrita dagoen plakaren aurrean. Argazkian, Getxoko Udalak San Inazio plazan egin ohi du "terrorismoaren biktimen" aldeko omenaldia.
Lidonen hilketan lagundu zuelakoan, Orkatz Gallastegi berangoztarra zigortu zuten, nahiz eta Amnistiaren Aldeko Mugimenduak hainbatetan salatu frogak eta epaiketak "muntaia" zirela, Estatuak "norbait" zigortu bide zuelako: "Orkatz hasieratik zegoen kondenatuta. Horretarako atxilotu zuten. Lidon ustez hil zutenak hilak ziren, eta errudun zuzenen bat behar zuten, bide batez, Lidonen familiarrek kasu hauetan errudunei aplikatzen zaien 'erantzukizun zibila' jasotzeko. Eta Orkatz hautagai ona zen Ertzaintzarentzat, Eusko Jaurlariarentzat. Eta hor dago, espetxean, Ertzaintzak, Eusko Jaurlaritzak, Espainiako auzitegiek, Espainiako Gobernuak, dirua legezko itxurak eginez kobratu beharrak, 'El Correo'k eta bestek kondenatuta". Urtzi Murueta leioaztarra ere auziperatu zuten arren, Lidonen hilketarekin zerikusirik ez zuela izan berretsi zuen Espainiako Auzitegi Gorenak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun