“Aldameneko familia” esperientzia Txekiako Errepublikan sortu zen duela bederatzi urte eta horrez geroztik hainbat tokitan ospatu da aldi berean. Getxok iaz bat egin zuen Gipuzkoako SOS Arrazakeria taldeak duela hiru urte martxan jarritako ekimenarekin eta udalerrian bizi diren 130 pertsona elkartu zituen 16 bazkaritan. Horietan bertoko familiek mahaia partekatu zuten Filipinetako, Peruko, Bolibiako, Senegaleko, Argentinako, Ekuadorreko, Rumaniako eta Uruguayko familiekin.
Esperientzia horren hainbat une bilduta geratu ziren ondoren burututako bideoan (© Getxoko Udala)
Getxok bigarren urtez jarraian ospatuko du “Bizilagunak: aldameneko familia” azaroaren 23an, igandea, Europako beste udalerri batzuek bezala. Getxoko Udalak, Egizu Getxo Euskaldun elkarteak eta Getxoko Etorkinak Plataformak Eusko Jaurlaritzaren laguntzarekin bultzatutako ekimena hainbat bazkariren inguruan euskal herritar, familia eta atzerritarrak elkartzean datza, “auzo berean bizi diren bertoko eta atzerritik etorritako familiak etxe batean elkartzea bazkaltzeko, beren errealitateez eta esperientziez hitz egiteko helburuarekin”, gogoratu du Elena Coria Immigrazio Unitateko zinegotziak. Bazkariak parte hartuko duten familien etxeetan izango dira eta topaketa bakoitzean bertoko familia bat, atzerritik heldutako familia bat eta bazkaria antolatzen lagunduko duen dinamizatzaile bat elkartuko dira. Bazkari bat partekatzeko edo dinamizatzaile izateko pertsona interesatuek izena eman beharko dute www.getxo.net/bizilagunak helbide elektronikoan. Familia parte-hartzaileek aste bete geroago, Bizilagunak jaian parte hartu ahal izango dute Donostiako Victoria Eugenia Antzokian, EAEko familia guztiekin. Argazkian, iazko edizioan egindako bazkarietako bat / © Getxoko Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun