"Joan den urteetako omenaldien harira, Alkateari eskua luzatu diogu talde politiko guztien parte hartzea eta adostasuna lortuko duen akordioa bilatzeko, gaur egungo Osoko Bilkuraren sentipena islatzen duena. Alkatetzatik 2012rako beranduegi zela baina 2013ra begira lanean hasteko aukera zegoela erantzun zitzaigun. Hala ere, ez dugu inolako saiakerarik ikusi eta berriz ere, Osoko Bilkuraren parte den EH Bildu taldea eta herri honen memoria historikoaren parte diren biktima batzuk baztertzen dituen omenaldia ospatu da", azaldu du Getxoko EH Bilduk.
2009an, Getxoko Udalbatzak "terrorismoaren biktimei" omenaldia egitea adostu zuenean, EAJ, PP, PSE-EE eta Ezker Batua baino ez zeuden ordezkatuta aipatu erakundean, ezker abertzalearen ilegalizazioaren ostean.
Getxoko Udalak "terrorismoaren biktima guztien oroimenezko urteko ekitaldia" egin du gaur astelehenean, azaroak 10, tokiko iturriek zabaldu dutenez. Udaletxe aurrean, San Inazio plazan, minutu bateko isilunea gorde ondoren, hiru txistularik "Agur jaunak" jo dute. Amaitutakoan, Imanol Landa alkateak bertan dagoen eskulturaren oinean lore sorta bat utzi du, 2009ko martxoko odol osoko bilkuran adostutakoari jarraiki. Ekitaldian aurreko urteotako egoera errepikatu da: EAJ, PP, PSE-EEren zinegotziek parte hartu dute, EH Bildukoek izan ezik. "ETAk Getxo udalerrian egindako atentatuetan edo getxoztarrak izanik herritik kanpo hildako 19 pertsona eta GALek eraildako beste bat —Xabier Galdeano kazetari algortarrari buruz—" oroitzeko ekitaldia dela azaldu izan du aurreko urteotan Landak. Getxoko EH Bilduren ustez, ordea, hori ez da horrela: gaurkoan ere "ez zaio biolentzia ezberdinek eragindako giza sufrimendu osoari erreparatu". "Beraz, ez da Getxoko herriaren Memoria osoa kontuan izan", gaineratu dute koalizio abertzaletik. Gogoratu, besteak beste, 1969ko Itzubaltzetako jaietan, Francoren garaiko Getxoko udaltzain batek tiroz erail zuela Felix Arnaiz Maeso "Lagun" 20 urteko gazte leioaztarra. Argazkian, Imanol Landa alkatea lore eskaintza egiten / © Getxoko Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun