Ertzaintzak 24 urteko gizon bat atxilotu zuen atzo arratsaldean Areetan, bulego batean sakeleko telefonoa lapurtzea egotzita. Europa Press albiste agentziak zabaldutakoaren arabera, aipatu bulegoko balkoira heldu zen gaztea, eraikinean lanak egiteko jarritako aldamioak erabilita. Bestalde, ostiralean, hilak 14, 25 urteko gizonezkoa atzeman zuen EAEko Poliziak, goizeko 9ak aldera, Neguriko urbanizazio bateko trastelekuetan indarrez lapurtzea egotzita. Eusko Jaurlaritzaren Segurtasun Sailak zabaldutako bertsioaren arabera, komunitateko langile batek atxikitu zuen ustezko lapurra, ertzainen patruila iritsi arte. Diotenez, Bilboko Rodriguez Arias kaleko obra bateko aldageletatik joan den astean lapurtutako hainbat agiri (DNI eta gidatzeko baimen bana) ere bazeramatzan aldean.
Dirudienez, urbanizazioko langileak harrapatu zuen gaztea garajeetan dauden trastelekuetan lapurreta egiten. Aurkitu zuenean, bihurkin batekin mehatxu omen egin zion ustezko lapurrak langileari, beti ere Segurtasun Sailak dioenaren arabera. Ondoren, alde egin eta atari batean ezkutatu ondoren, bertan harrapatu zuen beharginak. Behin Ertzaintza bertara helduta, ustezko lapurra identifikatzen ari zirela, zortzi trasteleku bortxatuak izanaren zantzuak zeukatela ikusi zuten poliziek: ateetako batzuk palankaz irekiak zeuden eta beste batzuetan aireztatzeko sareta apurtuta zegoen. Motxilan hainbat tresna ei zeramatzan identifikatutako gazteak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun