Gaur zeukaten epailearen aurrean aurkezteko hitzordua, etxetik kaleratzera zihoazen familiarekiko elkartasunez, ekainaren 24an Algortako Aldapa kaleko 23. atariren ondoan batutakoetatik Ertzaintzak identifikatutako 14 lagunek. Aurretik, baina, dena erabakita zegoen. Fiskalarekin hitzarmena adostu ostean, 60 euroko isuna baino ez du ordaindu behar izango bakoitzak. Epaiketa bezala, besteak beste, Getxoko EH Bilduk eta Auzokideok plataformak goizeko 11etarako Justizia Jauregiaren aurrean deitutako kontzentrazioa bertan behera geratu da. Dena dela, aipatu lagunei "faltengatik isun sinbolikoa" jartzeko aukera "bidegabekeriatzat" jo du auzotar elkarteak batzen dituen kolektiboak. Gogoratu, egun berean atxilotutako gazteari 600 euroko isuna jarri ziotela, uztailaren 9an egindako epaiketan. Auzokideok plataformak plazaratutako oharraren arabera, etxetik kaleratzera zihoazen familiarekiko elkartasuna adierazi duten herritarrak zigortzea "eskubide eta askatasunen inboluzioaren beste adibide bat" baino ez da. Ildo horretan, "pitinka-pitinka baino gelditu barik" gertatzen ari diren etxe-gabetzeei jarraipena egin eta horiek nola salatu aztertzeko, eragile eta norbanakoak datorren astean batuko direla adierazi dute. Argazkian, ekainaren 24ko etxe-gabetzea / © Getxotik_aske.
Behin, kontzentrazioa bertan behera geratu ostean, hiruzpalau lagun baino ez da bildu Justizia Jauregiaren aurrean, azken erabakia ezagutu barik epaitegira hurbildu zitezkeen gizon-emakumeak ohartarazteko. Hasiera hasieratik, baina, bertan izan dituzte Ertzaintzaren patruila-auto eta patrol bana. Eraikin atarian zain egon dira lau polizia agenteak, galoiak zeramatzanak orri-sorta zeukala eskuetan, elkarretaratzea noiz hasiko. Ekainaren 24an identifikatutako 14 lagunak Justizia Jauregiko eskaileretan batzen hasi direnean Brigada Higikorreko bi furgoneta batu zaizkie aurreko kideei, bildutakoen harridurarako. Esatea, kontzentrazioa komunikatuta zegoela. Ertzainak bertan izan dira 14 lagunak epaitegitik irten diren arte.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun