Leioa erdibitzen duen errepidea herriko hirigintza oztopo nagusiena dela azpimarratu du Fullaondok. “Azpiegitura horrek Leioako erdigunea bitan zatitzen du eta nabarmen mugatzen du herriko bizitza soziala. Gainera, arazo akustiko garrantzitsuak eragiten dizkie inguruan bizi diren leioarrei eta ingurugiroan ere eragin negatiboa du”, zinegotzi ezkertiarrak nabarmendu duenez. EH Bilduk azaldu duenez, errepidea estaltzea “ez da kapritxozko eskaria, oinarrizko beharra baizik. Bai hirigintza ikuspegitik, nahiz sozialetik eta ingurugiroarekiko errespetutik”.
EAJ eta Leioako interesak
“Nekaturik gaude hainbesteko atzerapen eta betetzen ez diren hitz emateekin. Leioak ez du halakorik merezi eta beste behin ikusi dugu Bizkaiko Foru Aldundiak Leioa bigarren mailako herritzat duela”, gaineratu du Fullaondok. Era berean, Leioako EAJk “herriko interesak defendatzeko duen ahalmen eskasa” nabarmendu du. “Ez zituzten Leioako interesak defendatu metroa eraiki zenean eta geltokia erdigunetik kanpo egin zen, ez zuten egin Lamiako inguruan metroa estaltzeko eskariarekin, ez dute egin tranbiaren proiektuarekin eta ez dira gai izan Lamiakoko makroaraztegia geldiarazteko garaian ere”, esan du udal hautetsiak. Koalizioaren ustez, "argi gelditu da beste behin, azpiegiturei dagokienean EAJk ez dituela Leioako interesak babestu nahi".
2014ko lehenengo seihilekorako egon behar bazuen arren, Avanzada errepideko tunelak estaltzeko proiektua prest ez daukala onartu berri du Bizkaiko Foru Aldundiaren Herri Lan Sailak, tramitazio arazoak argudiatuz. 2011n esleitu zioten Sener enpresari, 2.290.000 eurotan. Obrak hasteko, 2015eko aurrekontuetan "diru-partidarik ere ez" dago, besteak beste, foru iturrien ahotik "El Correo Español" egunkariak atzo zabaldu zuenez. Hartara, ez dute inondik inora espero datorren urtean Avanzada estaltzen hastea. Bada, gaur emandako prentsaurrekoan, proiektuaren atzerapena kritikatu du Leioako EH Bilduk. “Artatzako errepidearen estaltzea Leioako bizilagunen aldarrikapen nagusienetakoa da. 3.000 leioaztarrek sinaduraz egindako eskaria urtez urte, EAJk atzeratzen duen exijentzia, proiektua gauzatuko duela behin eta berriz esan arren”, adierazi du Arkaitz Fullaondo zinegotziak. Argazkian, Aitor Torre batzarkidearekin batera eman du prentsaurrekoa Arkaitz Fullaondo zinegotziak / cc-by Leioako EH Bildu.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun