Hain zuzen ere, Bizkaiko hiriburuko Lersundi kaleko 16. zenbakian, bere etxean, hilik topatu zuten asteazken goizean Koldo Losada, buruan kolpea zuela. Handik ordu gutxitara atxilotu zuten bere bikotekidea, aktore getxoztarraren hiltzailea delakoan. Ordutik Ertzaintzaren eskuetan dago gizona eta, jakinarazi dutenez, datozen orduetan epailearen aurretik pasako da. EITBk zabaldutakoaren arabera, bihar izango da hori. Losadari egindako autopsiaren emaitzen zain ere badaude ikertzaileek.
Koldo Losadak ibilbide luzea zuen aktore gisa. Antzerkian zein telebistan egin zuen lan, "Pilotari", "Goenkale", "Cuéntame", "Aida", "Amar en tiempos revueltos" edo "Águila Roja" telesailetan, baita zineman ere, "Eutsi" (2006), "Mystikal" (2008), "No Controles" (2010) eta "El abuelo que salto por la ventana y se largó" (2013) filmetan, besteak beste.
Koldo Losada aktore getxoztarra zena etzidamu, astelehena, agurtuko dute. Elizkizunak arratsaldeko 7:30ean egingo dituzte, Algorta eta Neguri arteko mugan dagoen Loiolako San Inazioren elizan. Bitartean, gorpua ikusi eta adio esateko beilatokia Algortako etorbideko Sarria tanatorioan kokatu dute. Bestalde, Losadaren zoritzarreko heriotza dela eta, doluminak agertu ditu Imanol Landa Getxoko alkateak, Udalaren izenean. Landak bere egin du familiaren atsekabe handia eta nabarmendu nahi izan du 54 urteko getxoztarra "Estatu mailako arte eszenikoen pertsonai garrantzitsua" zela. Halaber, maitasun guztia agertu dio haren familiari. Halaber, Bilboko Udalak, udal aurrekontuak onartzeko gaur goizean izan duen ezohiko bilkuran, minutuko isilunea gorde du zenduaren omenez. Talde guztiek sinatutako agirian, lagun eta senideei doluminak azaldu nahi izan dizkiete. Argazkian, Koldo Losada "Wilt. Panpina puzgarriaren hilketa" antzezlanean / © Ados Teatroa.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun