1953an Erandion jaio zen Alex Angulo oso gaztetatik ahalegindu zen antzezle izateko zuen borondate irmoa errealitate bilakatzen. 1981ean egin zuen lehenengo lana Imanol Uriberen eskutik, "La fuga de Segovia" filmean. Urte berean, Comicos de la Legua eta Karraka antzerki taldeetan hasi zen antzerkia egiten eta euskal antzerkigintza independentearen profesionalizazioan parte hartzen.
80ko hamarkadan ETB-ko hainbat programatan hartu zuen parte, baina hurrengo hamarkadan finkatu zen talde antzezle gisa. Garai hartako arrakasten artean "Todo por la pasta", edota Goya sarietarako lehenengo izendapena ekarri zion "El Día de la Bestia" (1995) aipa daitezke. Filma horretan protagonista izan zen lehen aldiz. Egin dituen lan azpimarragarrien artean, "A mi madre le gustan las mujeres" (2002), "El laberinto del fauno" (2006) edo Oscar Aibarrek zuzendu zuen eta Goya sariak irabazteko hirugarren izendapena ekarri zion "El gran Vazquez" aipa daitezke. 2010ean, Donostiako Zinemaldian Zinemira saria eskuratu zuen. Talde lanaren garrantzia goraipatu zuen ekitaldian.
Joan den uztailaren 20an, Gaizka Urresti zinegilearen esanetara "Bendita calamidad" film luzea egiten ari zela, auto istripu batean hil zen, Fuenmayorren (Errioxa), Logroñotik Zaragozarako bidean lanera zihoala. 61 urte zituen.
Erandioztarra izan eta Madriletik hainbatetan pasa arren, Alex Angulok Bilbo udalerriarekin izan zuen lotura estua, bai bizi zen Loruri auzoarekin, bai askotan ibiltzen zen Deustuko errepublikarekin, baita film laburren ikus-entzule leiala zenez Zinebiren edizio guztiekin ere. "Bertan beti erakutsi zuen bere xumetasuna eta ikus-entzuleekiko hurbiltasuna", festibaleko kideek gogoratzen dutenez. 2011n Arriaga antzokiko eszenatoki gainera igo zen, "La mujer del hatillo gris" lana dela eta, jaialdiaren 53. edizioak Espainiako Zinearen Sari Nagusia eman baitzion, Luis Trapiello zinegilearekin batera. Lan horren protagonistak Alex bera eta Aitana Sanchez-Gijon izan ziren. Jaialdiak bere historian ematen duen hil ondorengo lehenengo Ohorezko Mikeldi honekin, Zinebi 56k bere maitasuna helarazi nahi dio Alex Angulori, eta bere oroimena betirako gorde eta zabaldu nahi du.
Bilboko Dokumental eta Film Laburren Nazioarteko Jaialdia Zinebik joan den uztailaren 20an zendu zen Alex Angulo aktore erandioztarra omenduko du gaur gauean, hil osteko Ohorezko Mikeldi saria emanez, "antzezle paregabe eta gizon bikaina" izatearren. Jaialdiaren amaiera ekitaldian, Mayda Zabala emazteak eta Dodo alabak jasoko dute saria Arriaga antzokian. ZINEBI 56k, joan den uztailean hil zen Alex Angulo antzezle bilbotar handiari emango dio bere Ohorezko Mikeldietako bat, Euskal Herriko eta Espainiako zinemak azken hamarkadetan izan duen aurpegi ezagunenetako eta maitekorrenetako bati. Sari horrek, bilbotarrek "antzezle benetan langileari eta bere lanbideaz maiteminduta zegoenari" eskaini nahi dioten omenaldi beroa irudikatzen du, Zinebiko kideek azpimarratu dutenez. Angulok "interpretazio erregistroetan aniztasun eta aberastasun harrigarria zabaltzen jakin zuen, kontaezinezko pertsonaiak antzezteko, guztien ezaugarri komuna humanitate handia eta dramatismo sakona izanik, baina ikus-entzuleen zaletasuna eta maitasuna lortzera eraman zuten antzezpen berezia eta umore bikaina baztertu barik". Argazkian, Alex Angulo / cc-by-sa "Prest" aldizkaria - Uriola.info.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun