Koldo Losada aktore getxoztarra zena etzi, astelehena, agurtuko dute. Elizkizunak arratsaldeko 7:30ean egingo dituzte, Algorta eta Neguri arteko mugan dagoen Loiolako San Inazioren elizan.
Besteak beste, doluminak agertu zituen atzo Imanol Landa Getxoko alkateak, Udalaren izenean. Landak bere egin zuen familiaren atsekabe handia eta nabarmendu nahi izan zuen 54 urteko getxoztarra "Estatu mailako arte eszenikoen pertsonai garrantzitsua" zela. Halaber, maitasun guztia agertu zion haren familiari. Halaber, Bilboko Udalak, udal aurrekontuak onartzeko atzo goizean izan zuen ezohiko bilkuran, minutuko isilunea gorde zuen zenduaren omenez. Talde guztiek sinatutako agirian, lagun eta senideei doluminak azaldu nahi izan zizkieten.
Eusko Jaurlaritzak ere "atsekabea" agertu du Koldo Losadaren heriotza "dramatikoaren" aurrean. Gasteizko Gobernuak goratu egin du aktoreak "zineman, antzerkian eta telebistan egindako ibilbidea", eta "denon memorian" izango dela adierazi du. Halaber, Losada "profesionaltasun eta malgutasun adibidea" zela esan du.
Koldo Losadaren senarra bart, 23:45ean, sartu dute Basauriko espetxean, 54 urteko aktore getxoztarraren hiltzailea delakoan. Europa Press albiste agentziak Eusko Jaurlaritzaren Segurtasun Sailaren iturriak aipatuz zabaldu duenez, iluntzeko 8etan eraman zuten epailearen aurrera eta Bilboko Guardia epaileak kartzelara bidaltzeko agindu zuen, 22:30ak pasata. Bilboko Lersundi kaleko 16. zenbakian, bere etxean, hilik topatu zuten asteazken goizean Koldo Losada, odol artean, buruan kolpea zuela. Handik ordu gutxitara atxilotu zuten bere bikotekidea. Etxetik gertu dagoen edukiontzi batean, aktorearen txakurra itota eta, ustez, hilketan erabilitako hainbat tresna topatu zituen Ertzaintzak. Ez, ordea, hilketarako erabilitako arma. EiTBk zabaldu duenez, atzemandakoak ez du bere gain hartu hilketa, zenbait hedabidetan hala publikatu badute ere, eta ez du ertzainen aurrean deklaratu nahi izan. Argazkian, Koldo Losada "Wilt. Panpina puzgarriaren hilketa" antzezlanean / © Ados Teatroa.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun