Zobaranek zein beste hiru zigortuek hamar eguneko epea izango dute helegiteak aurkezteko. Horrela jokatu ezean, behin betikoa izango da Aletxu Zobaran eta epaitutako gainontzeko kideen kontrako sententzia. Gerta ala gerta, Frantziako justiziaren kontuak kitatu ostean gorliztarra zein gainontzeko besteak Estatu horretatik kanporatuko dituzte.
"Berria" egunkariak zabaldu duenez, Ludovic Lestel fiskalak aitortu du Zobaran ETAko buruzagi militarra zenik esateko frogarik ez dela, ezta Oroz logistika arduraduna zenik adierazteko ere, Espainiako Gobernuak biak atxilotu zituztenean lau haizetara zabaldutakoari aurka eginez. Halere, fiskalak defendatu egin du Orozek "leku garrantzitsua" zuela logistikan. Are gehiago, Lestelen ustez biak atxilotzea eragina izan zuen ETAren jardun armatuaren amaieran. Bestalde, ETAk borroka armatua utziko zuela iragartzeko 2011ko urriaren 20an egin zuen adierazpena auzitan jarri du, lau auziperatuak "beren jardunera edo klandestinitatera itzultzeko aukera" sumatzen duela esatean.
Zobaran, Oroz, Labaka eta Saez de Jauregi 2011ko martxoaren 11n atxilotu zituzten Frantziako iparraldean. Zobaran Parisko La Sante espetxean izan ondoren, Lyon Corbas kartzelara eraman zuten. Bertan, hainbat borrokalditan parte hartu izan du bizi baldintza duinak aldarrikatzeko.
Aletxu Zobaran Gorlizko preso politikoari zortzi urteko kartzela zigorra ezarri dio Parisko epaitegi bereziak, ETA erakundeko kide izatea frogatutzat jota. "Berria" egunkariak jakinarazi duenez, ostegunean abiatu eta atzo bukatu zen Zobaranen aurkako epaiketa. Defentsa zein akusazioaren alegatuak entzun ondoren, atzo bertan eman zioten epaia Urduñan bizi den gorliztarrari eta berarekin batera epaitu zituzten Mikel Oroz, Iban Saez de Jauregi eta Urko Labaka euskal herritarrei. Azken horiei, hurrenez hurren, zortzi, zazpi eta sei urteko zigorrak ezarri zizkieten. Hamarnaka urteko zigorra eskatua zuen aurretik fiskalak, "terrorismo" delituak egin izana leporatuta. Argazkian, gaur eguerdian dozenaka lagun batu dira Urduñan epaiketa salatu eta Zobarani sostengu emateko / cc-by-sa Josu Ganzabal - Aiaraldea.com.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun