Jardunaldian Nagoreren kasuari buruz gogoeta egingo dute eta, halaber, pelikularen zuzendariak azalduko du nola egin zuen dokumentala.
Bilboko Irakasleen Unibertsitate Eskolako Berdintasun Batzordeak antolaturiko ekitaldi biek “Gogora ekarri berriz gerta ez dadin!" leloa dute eta azaroaren 25eko Emakumeenganako Indarkeriaren Kontrako Egunaren Oroitzapena egiteko izango dira.
Astelehen honetan, azaroak 24, genero indarkeriari buruzko ikuspegi orokorra eskainiko dute Mentxu Hernando Eusko Jaurlaritzaren Agintzari zerbitzuko teknikari eta giza-hezitzaileak eta Mila Amurrio EHUko Soziologia irakasleak. Hitzordua 11:30ean jarri dute, Bilboko Irakasleen Unibertsitate Eskolako (Sarriena Auzoa, z/g, Leioa) Juana Agirrezabala aretoan. Hernandok “Violencia de género: luces y sombras” hitzaldia emango du, non azalduko duen momentu hauetan zein motatako telefono-deiak jasotzen diren eta arreta eskatzen den, EHUko iturriek azaldu dutenez. Bestalde, "Genero indarkeria eta gazte unibertsitarioak" izenburupean Amurriok aztertuko du nola ikusten duen gazteriak generoarekin lotutako gaiak. Mintzaldiak bukatu ostean, galdeketa eta eztabaidaren txanda irekiko da. Bitartean, asteartean, azaroak 25, 11:00etan, EHUko areto nagusian "Nagore" dokumentala proiektatuko dute. 2008ko San Fermin jaietan, Iruñean, Nagore Laffage Erizaintzako ikaslearen erailketari buruz doa filma. Pelikula ikusi ondoren Helena Tarberna zine-zuzendariak parte hartuko du irekiko den debatean. Argazkian, Nagore Laffage gogoratzeko kontzentrazioa Nafarroako Unibertsitatean / cc-by-nd Universidad de Navarra.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun