Getxon ala bertatik kanpo jaio, 15 bazkaritan 130 getxoztar batu ditu "Bizilagunak" ekimenak
Igandean, 130 bat lagunek parte hartu zuten Getxoko Udalak, Egizu Getxo Euskaldun elkarteak eta Getxoko Etorkinak plataformak bultzatutako “Bizilagunak: aldameneko familia” ekimenaren barruan izandako 15 bazkarietan. Iaz ere 130 pertsona elkartu zituen 16 bazkaritan, udal iturriek emandako datuen arabera. Elkar ezagutu eta beren errealitate desberdinei buruz hitz egiteko, 30 familiek eta 15 dinamizatzailek partekatu zituzten janariak, eta esperientzia oso positibotzat jo dute, "ekimenak beraien arteko hurbilketa eta ezagutza ahalbideratu zituelako". Etxekoekin batera, Filipinak, Peru, Bolibia, Argentina, Ekuador, Errumania, Uruguai, Mexiko, Guatemala, Frantzia eta Ingalaterrako familiek hartu zuten parte. Larunbat honetan, azaroak 29, parte hartu duten EAEko udalerri desberdinetako familiei eta dinamizatzaileei aitorpen-ekitaldia eskainiko diete Donostiako Victoria Eugenia antzokian. Getxoko Udalak eta Egizu elkarteak autobus bat antolatu dute, getxoztarrek Donostiara joan ahal izateko. Argazkian, igandeko bazkarietako bat / © Getxoko Udala.
“Aldameneko familia” esperientzia Europako toki desberdin batzuetan ospatu zen igandean, Txekiako Errepublikan duela bederatzi urte sortu ondoren. EAEn 320 familia eta 160 dinamizatzaile batu ziren 160 bazkaritan, 1.400 bat lagunen partaidetzarekin. Gipuzkoako SOS Arrazakeriak duela hiru urte martxan jarri zuen ekimena.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun