Topatu.info agerkariak zabaldutakoaren arabera, aurretik Iñaki Gorizelaia EHUko errektorearekin telefonoz hitz egitea lortu dute, eta hark ez omen du lehentasun gisa hartu gaia: “Hamabost egunean behintzat beteta dut agenda”. Bere ordez errektoreordea eta bitartekari bat bidali ditu ikasleengana, eta adostu dute asteartean bilduko direla. “Helburua hau zen, lortu dugu, baina borroka hasi besterik ez da egin”, adierazi dute ikasleek okupazioari amaiera emanez.
Europan egosten ari den unibertsitate erreforma "Bolonia famatuaren jarraipena" baino ez dela uste du IAk. Bere hitzetan, "isilpean eraman nahi duten hurrengo erasoa". Ikasle Abertzaleen ustez, "aldaketa sakonagoei bide emateko lehengo keinua" litzateke, EHUren Gobernu Kontseiluak gaur Bilbon ez-ohiko bilkuran (10:00etan, Bizkaia Aretoan) mahaigainean zuen Berregiturapen planaren onarpena, "fakultateak batzea ekarriko duelako”. Hori dela eta, Desobedientziaz Irauli! Astea garatzen ari dira egunotan.
Ikasle Abertzaleen irakurketa:
Azken urte hauetan eta batez ere Bologna plana aplikatu zutenetik, gure herriko unibertsitate publikoa izan beharko lukeen EHUren aurkako erasoak pairatzen dihardugu. Gainera, eraso hauek ez daude unibertsitatera zuzenduta bakarrik, baizik eta hezkuntza sistema osoan zapalkuntzak areagotzera. Aurreko urtean LOMCErekin saiatu ziren, eta orain EU2015 inposatzera datoz. Europar Batasunaren unibertsitatetarako estrategia GATS akordioan eta EE2020 estrategian oinarritzen dira, eta hauek zerbitzuen pribatizazioa (“liberalizazioa” deitzen dutena) dute helburu nagusienetakoa, hezkuntzarena besteak beste.
Estrategiaren helburuok markatutako datetarako bete ezean Estatu sinatzaileei santzioak egingo zaizkie, eta beraz, estatu espainiarra sinatzaile den heinean EU2015 aurrera eramango du. Era berean, EHUk bere 2017ra arteko Plan Estrategikoan EU2015 goraipatzen du, eta hori dela eta, aurrera eramango duela aurreikusten dugu, isilpean izan arren.
Hori dela eta, EU2015 ikasleoi eta Euskal Langile Herriari erabateko eraso larria den heinean, hau guri inposatu ezin izateko bermeak lortu behar ditugu. Honegatik Ikasle Abertzaleok EHUko errektoretza taldeari eta Eusko Jaurlaritzari honako hau eskatzen diogu:
1. EU2015 eta 3+2 erreformak ez onartu eta aplikazioa ekiditera konprometitu daitezen. Ez dugu onartuko gure hezkuntza merkatuaren mesedetara egoteko errentagarritasunean, indibidualismoan eta lehian oinarritutako neurriak hartzea, ez eta jakintza eta kapital soziala eta gure etorkizuna bera ere, esku pribatuetan uztea.
2. Gaur egun bermatzen ez diren euskaraz ikasteko eskubidea eta ikas baldintza duinak berma ditzaten. Gure hizkuntzaren normalizaziorako pausoak ematen hastea exigitzen diegu. Bestalde, edozein herritarrek unibertsitatean baldintza duinetan ikastea bermatzea eskatzen diegu.
3. Unibertsitatea herriaren mesedera jartzeko neurriak diseinatu eta martxan jartzeko ikasleokin batera trantsizio mahai bat sortzera konprometitzea. Honela ikasleok hainbestetan eskatu dugun herritik eta herriarentzat den hezkuntza bat eraikitzerako bidean kokatzeko.
Honetarako EHUko errektoretza taldeari gurekin negoziazio mahai bat sortzeko eskatzen diogu. Mahai hau, ikasleon nahiak eta beharrak errespetatuko dituztela bermatzeko beharrezkoa da, negoziazio mahai hau gabe, ez dugu inolako bermerik. Guk, mahai honetara ikasleon iritzia eta erabakiak eramateko fakultate guztietako gela guztietaraino helduko den prozesu parte-hartzailea martxan jartzeko asmoa dugu, baina erabakiok kontuan hartuko direnaren bermeak behar ditugu.
Hau hala izanik, Iñaki Goirizelaia eta errektoretza taldea bera gurekin batera negoziazio mahai hau egitera konprometitu eta lehen bileraren data jarri arte errektoreordetzan eta fakultatetako dekanotzetan itxialdian geldituko gara. Ez dugu onartuko inondik inora gure aldarrikapenei muzin egitea eta hartaz, modu mugagabean hemen geratuko gara unibertsitatearen funtzionamendua etenduz, berebiziko premia duen mahai hau sortuko denaren bermeak izan arte.
Stop EU2015!
Gora ikasleon borroka!
Eraiki dezagun hezkuntza herritik eta herriarentzat!
Europan egosten ari den unibertsitate erreforma (EU2015) gaitzesteko asmoz, ehunka ikasle batu da gaur Leioako campusean, Ikasle Abertzaleek (IA) deituta. Manifestazioan abiatu ostean, errektoretzara sartzen ahalegindu dira lau ikasle Iñaki Goirizelaia errektorearekin hitz egitera. Erreformak ez aplikatu eta unibertsitateko zuzendaritzak eta ikasleek "herriaren mesedetan egongo den hezkuntza sistema eraikitzeko trantsizio mahai bat osatzeko" eskaera helarazi nahi zioten EHUren buruari, Leioatik! ikasle proiektu komunikatiboak azaldu duenez. Baita euskaraz eta baldintza duinetan ikasteko eskubidea bermatzeko eskaera egin. Baina, ateak itxita topatu dituzte. Hori horrela, guztiak Mikel Laboa plazan batu ondoren, martxa lautan banatu eta Zuzenbide, Zientziak, Medikuntza eta Gizarte eta Komunikazio Zientzien fakultateak okupatu dituzte. Lehenengoan errektoreordetza eta beste hiruetan dekanotzak, hain justu. Bertan egon dira Goirizelaia, bere taldea eta IAren ordezkarien arteko batzarra hitzartu duten arte. Asteartean bilduko dira. Argazkian, manifestazio jendetsua Irakasle Eskola igarota / cc-by-nc Leioatik!
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun