Aletxu Zobaran Gorlizko preso politikoa "mitard"-era, zigor ziegara, eraman zuten herenegun, senideek eta Etxerat elkarteak salatu dutenez. Izan ere, beste bi kiderekin batera
Parisen epaitu eta zigortu ostean, pasa den asteazkenean Zobaran eta Urko Labaka Lyon-Corbas-eko espetxera garraiatu zituzten. Etxeratek emandako informazioaren arabera, "bortitza" izan zen espetxe horretan berriz sartzea. Kartzelako guardiek gorliztarra arakatu eta soinean aspaldidanik eramaten zituen sinbolo politiko batzuk kendu zizkioten; "Udalbiltzaren pina eta zilarrezko lepokoa", senideek zehaztu bezala. Horrek "istilua" piztu zuen eta Zobaran "mitard"-era "arrastaka" eraman zuten. Bertan, gaua pasatu zuen maindire bakarraz, "urtaro honetan egiten duen hotz handia" jasanez, sendiak nabarmendu duen legez. Horretaz gain, "ecrou" edo kartzelatze zenbaki berria jarri zioten Zobarani eta, hortaz, aurretik eskatuak zituen bisitak kendu eta abendu erdira arte ez duela berririk izango esan diote. Senideek ezin izango dute abenduaren 20ra arte ikusi. Gainera, espetxeko diru kontua ere blokeatu diote. Bitartean, familiak Zobaranen ahotik ezagutu du egoera, presoari deitzen utzi baitiote, telefono-kontuan soberan zuen diruaz. Gauzak horrela, bihar, Zobaranen epaiketa eta isolatzea zein
Eider Uruburu Zabaletaren atxiloketa salatuko dituzte Gorlizen, 19:00etan, Txoko Etxeren alboko plazan, "Aletxu askatu, konponbide garaia da" lelopean. Plentzian, bitartean, ez da hileko azken ostiraleko elkarretaratzerik izango eta Gorlizera joateko eskatu dute bertako antolatzaileek. Argazkian, Zobaranen aldeko protesta Urduñan / cc-by-sa Josu Ganzabal - Aiaraldea.com.
Etxeratek ere "gogorki" salatu ditu gertakari horiek zein, bereziki, Eider Urubururen atxiloketa. Preso ohia eta Zobaranen emaztea da Uruburu, egun Fresneseko espetxean dena. Etxeratek gogora ekarri du Eider Uruburuk, preso ohia, estatu frantsesean egoteko debekua daukala. "Horren ondorioz, eta duela urteak, ezinezkoa du bikote horrek elkar ikustea. Eider Uruburu auzira joan zen, bere mutil laguna ikusteko aukera bakarra zelako". Bertan, joan den ostiralean, Zobarani muxu bat ematera joan zenean, Uruburu ezagutu, atxilotu eta espetxeratu zuten, debekua urratzeagatik. Astelehenean, berehalako auzian zortzi hileko zigorra ezarri eta Fresnes espetxera eraman zuten.
Etxeratek salatu du "dispertsioa, urrunketa, gure senideen isolamendua, kondenen luzapen izugarria eta holako neurrien gain, beste hainbat debeku eta trabarekin bizi behar garela, eta asko direla, adibidez, elkar ikusteko aukera ez duten bikoteak edota familiak estatu frantsesean egoteko debekuengatik. Berriz ere, espetxean edo ihesean dauden gure senideen aurka martxan diren salbuespeneko neurrien desaktibatzea eta oinarrizko eskubideen errespetua eskatzen dugu".
Eider Uruburu: "Senarra ikustea eta amatasuna ukatzen didate"
Eider Uruburu bilbotarrak Estatu frantsesaren aldetik jasaten duen debekuaz, sakabanaketaz, Zobaranekiko eskontzaz, haurdunaldiaz, abortuaz edota Lyon-Corbas espetxean zein ospitalean jasotako tratu umiliagarriaz aho bizarrik gabe mintzatu zitzaion epaiketaren aurretik Aiaraldea.com tokiko komunikabideari.
Emandako elkarrizketan azaltzen zuenez, "ezarri didate lurralde debekua. Hori dela eta ezin naiz Estatu Frantziarrean sartu. Haien argudioa da bere lurraldean sartuz gero erakundean sartu naitekeela berriro, baina horrek ez du inolako zentzurik, egin nahi izango banu ez nieke baimena eskatuko. Nik baimena eskatu dut nire senarra ikusteko. Baina debekatzen didate nire senarra ikustea izorratzeko. Nahi izango balute ni kontrolatzeko eskumena dute, beraz segurtasun arrazoi horiek gezurra dira. Horregatik helegitea jarri dugu. Espetxean nengoela birritan jarri genuen helegitea eta hori egiteko prozesua oso ezatsegina. Oso modu iraingarrian jokatzen dute; leporatzen digute mesedeak eskatzen ditugula, baina zure senarra ikustea eskatzea ez da mesedea, eskubidea baizik. Askatu ostean beste helegitea jarri nuen, ez dute onartu eta Europako Giza Eskubideen Epaitegia besterik ez zaigu gelditzen, baina horrek urteak beharko ditu. Bitartean senidea ikusteko aukerarik ez dizute ematen, amatasuna ukatzen dizute... bakarrik telefonoz eta eskutitzez komunikatzen gara".
Ekimenaren kartela
