"Euskal preso politikoek EHUn ikasteko eskubidea" aldarrikatu du Etxeratek
2014ko aza. 28a, 07:48
Euskal preso politikoei hezkuntza eskubidea bermatzeko aldarria Eusko Legebiltzarrera eraman zuen Etxerat elkarteak, pasa den asteazkenean. Ainhoa Larramendi Muxikak eta Lourdes Rodriguez Landa sopeloztarrak burutu zuten Hezkuntza Batzordeari pasa den urriaren 29an eskatutako agerraldia. Bertan, 2003tik aurrera presoei Euskal Herriko unibertsitateetan euskaraz ikasteko eskubidea "urratzen" zaiela eta ikasketak egiteko "traba" handiak dituztela salatu zuten Etxerateko ordezkariek. Izan ere, 2003ko maiatzean Espainiako Kongresuak Espetxeen Lege Organiko Orokorraren 56. artikulua aldatu zuen. Horren arabera, ordutik aurrera, soilik Espainiako Espetxe Erakundeen Zuzendaritzarekin hitzarmena duten unibertsitateak daude baimenduta Espainiako kartzeletan diren presoei klaseak emateko. Hortaz, EHUn ikasten zuten presoek aukeratu behar izan zuten, UNED Urrutiko Hezkuntzarako Espainiako Unibertsitatera sartu ala karrera utzi. Gainera, UNEDek ez die euskaraz titulaziorik eskaintzen. Argazkian, ezkerretik eskumara, EH Bildu taldeko Estitxu Breñas Hezkuntza Batzordeko burua, Larramendi eta Rodriguez / © Eusko Legebiltzarra.2004an, Eusko Legebiltzarrak Unibertsitate Legea onartu zuen eta bertan euskal presoek ikasteko duten eskubidea aitortu zuen, baina ordutik hona ia ez da aurrerapausorik izan. Presoei eta EHUri debekua jarri eta hamaika urte eta erdi beranduago, egoera ez da funtsean aldatu. Izan ere, herenegun Etxerateko kideek Espainiako Espetxe Erakundeen Zuzendaritzak behingoz EHUrekin hitzarmena sina dezala eskatu zuten, Espainiako kartzeletan diren euskal presoak euskal unibertsitatean matrikulatu eta euskaraz ikasi ahal izateko. Era berean, gatibuek bizi duten "egoera berezia" kontuan hartzeko eskatu zuten, ikasketak bermatzeari begira. Besteak beste, doako matrikulazioa eskatu zuten. Bitartean ere, bekak jasotzeko baldintzak egokitzeko aldarrikatu zuten. EH BIlduren babesa jaso zuten, talde soberanistak eskaerak gauzatzeko lan egiteko prest agertu zela. Bestalde, EAJk, PSE-EEk eta PPk ukatu zuten EPPKko kideak "preso politiko" izatea. Talde konstituzionalek, gainera, gogor jo zuten Larramendi, Rodriguez eta Etxeraten aurka.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun