Ohiturari eutsiz, igande honetan, azaroak 30, San Andres erromeria tradizionala ospatuko dute Sopelako izen bereko baselizan. 11:00etan kalejira hasiko dute udaletxetik tenpluraino. Bertan, meza egingo dute 12:00etan, eta horren ostean, ohorezko aurreskua, hamaiketako herrikoia eta erromeria izango dira, 12:30ean. Auzokideek baselizara heltzeko erraztasunak izan ditzaten, Sopelbusek zerbitzu berezia izango du. Udal iturriek zehaztu dutenez, baselizarako bidaia egiteko ordutegi bi egongo dira: 11:00etan eta 11:30ean. Urbaso aurreko autobus-geltokitik irtengo dira autobusak, eta geldialdi bi egingo dituzte: San Pedro elizaren aurrean eta Larrabasterrako Zutarri tabernaren aurrean. Bueltarako, 13:30ean eta 14:00etan irtengo dira eta ibilbide berbera egingo dute, alderantziz. Baina, Sopelan ez ezik, Barrikako Goierri auzoan ere ospatzen dute San Andres eguna. Horrenbestez, 11:00etan meza egingo dute baselizan. Ondoren, 11:45ean, Aita Gotzon abesbatzak emanaldia eskainiko du. Horren ostean, 12:15ean, Itxaso Paya eta Joanes Igeregi bertsolariak arituko dira, eta bukatzeko, hamaiketako herrikoia izango da. Goiz osoan nekazaritza postuak egongo dira frontoi txikian. Argazkian, Sopelan San Andres eguna ospatzen / © Sopelako Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun