Gainontzeko alderdi politikoek atzoko osoko bilkuran Leioako EH Bilduren proposamena ez babestu izana deitoratu du Fullaondok. “Bakarrik geratu gara. Egia da PSE eta PP-k proposamena onartu zutela hasiera batean, baina azkenean atzera egin dute. Ondorioz, mesede egin die Eneko Arruebarrena eta Jon Loizagari. Beste behin ere, nabarmen gelditu da EH Bildu dela, eta izan dela, Pinosolo kasua amaieraraino eramateko prest dagoen talde politiko bakarra". Koaliziokoek, baina, ez zuten ezagutzen prentsaurrekoa ematerakoan PPk emandako pausua.
EAJren jokabideari dagokionez zera adierazi du EH Bildukoak: "PNVk isiltasun legea ezarri izan du. Deituta izan diren EAJko karguak eta kargu ohiak ez dira deklaratzera joan. Arruebarrena eta Loizaga barne. Hau erakusten du gardentasunarekin duten konpromiso eza". Halaber, Ana Oregi Garraio sailburua eta Eneko Arruebarrena Metro Bilbaoren zuzendaria Eusko Legebiltzarrean agertzea eskatu du koalizioak, "gure ustez ustelkerian murgilduta dagoen pertsona batek berak okupatzen duen karguarekin inkonpatiblea delako".
Pinosoloko proiektuari buruzko ikerketa batzordeak “ustelkeria zantzu garbiak" azaleratu ditu Leioako EH Bilduren arabera. Koalizioaren hitzetan, “Eneko Arruebarrena alkate ohia eta Jon Loizaga Kirol zinegotzi ohia —biak ala biak EAJkoak— lotzen ditu izan diren irregulartasunekin”. Hori dela eta, batzordeak batu duen informazio guztia Fiskaltzaren eskuetan uzteko eskatu dio koalizioak Udalari. "Ikerketak datu, dokumentu eta adierazpenen bidez baieztatu du, Pinosoloko lehiaketa publikoan iruzur egin zuten enpresek (Aros eta Arcain-ek) ez ziotela Udalari ziria sartu. Aldiz, Arruebarrenak (egun Metro Bilbaoren zuzendaria) eta Loizagak lehiaketa publikoa izan aurretik enpresa horiekin harreman zuzena izan zutela frogatu da", azaldu du gaurko prentsaurrekoan Arkaitz Fullaondo zinegotziak. Ondorio berberera heldu da Leioako PP, atzoko udal batzarrean EH Bilduren proposamenaren kontra bozkatu zuen arren. Popularrek zuzenean jo dute gaur EAEko Auzitegi Nagusira, afera honetan erantzukizun penalak egon daitezkeen argitzeko asmoz. Fiskaltzan Arruebarrena eta Loizagaren kontrako salaketa aurkeztu dute. Argazkian, Arruebarrena prentsaurreko batean, oraindik Leioako alkatea zela.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun