Sergio Polo Algecirasen bakartuta daukate
2014ko abe. 1a, 18:46
Duela bi asteazken, bat-batean, Sergio Polo Escobés euskal preso politikoa Cordobako kartzelatik atera zuten Algecirasekora eramateko, Euskal Herritik are gehiago urrunduz. Botafuegoko espetxea Sopelatik 1.060 kilometrora dago. Bada, tokiko herri bilguneak gatibuaren gertukoen ahotik zehaztu ahal izan duenez, Madrilek aginduta lehen graduko lehen fasea aplikatu diote Polori eta honek, "ondo dakigunez, isolamenduko moduluan hiru hilabetez (gutxienez) isolatuta" egotea dakarkio. Bakar-bakarrik dago eta egunean bi orduz patiora atera daiteke, gaineratu dutenez. Egoera horrek bisitetan ere badauka eragina. Bi ordutegietara murriztu dizkiote: larunbatean, 10:00etan; edo igandean, 12:00etan. Dagoeneko berak hori aldatzea eskatu du, senideen autobusaren ordutegiekin bat egineko, baina oraindik ez diote erantzunik eman. Argazkian, 2013ko hasieran preso politiko sopeloztarrak Picassenten eta Cordoban jasandako isolamendu egoera salatu zuten herrikideek / © Sopelako Herrira."Astelehenean berarekin hitz egin genuenean lasai dagoela esan zigun. Espetxeko zaindariengandik tratu zuzena jasotzen omen duela. Kideek segurtasun buruarekin eta zuzendariarekin hitz egin zuten Sergioren egoera dela eta. Ikusiko dugu. Gure eskutitzak jasotzeak, nire ustez, asko lagunduko dio fase berri-zahar honetan...", azaldu dute gertukoek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun